Сэлэнгэ аймгийн Ерөө сумын Бугант багийн “Их-Алт” гэдэг газар “Хасу” алтны бичил уурхайн ойролцоо, голоос ус авах гэж байгаад унаж живсэн хэрэг гарлаа. Энэ осол аймгийн төвөөс зүүн урд зүгт 200 км-т, сумын төвөөс урд зүгт 115 км газарт болжээ. Тодруулбал, Төв аймгийн харьяат 30 настай залуу Ч энэ сарын 8-ны орой Хэрийн голоос ус авах гэж явсан бөгөөд алтны уурхайн ажилчид түүнийг усанд унаж живсэн гэх дуудлагыг 20:22 цагт өгсөн байна.
Дуудлагыг хүлээн авсан тус аймгийн Онцгой байдлын газрын Эрэн хайх, аврах ангийн алба хаагчид, аймгийн Цагдаагийн газрын алба хаагчдын хамт 200 км замыг туулан 9-ний өдрийн 09:00 цагт очиж, эрэн хайх ажиллагааг зохион байгуулсан аж. Улмаар мөн өдрийн 17:08 цагт осолдсон газраас 1 км Орхон гол, Хэрийн голын бэлчирээс цогцсыг олж тус сумын Цагдаагийн хэсгийн төлөөлөгчид шилжүүлэн өгчээ.
