Улстөрийн супер онигоо: Н.Батбаяр гишүүн эмнэлэгт үзүүлэхэд гэмгүй болжээ

 

 

Эдийн засаг,
хөгжлийн яамны сайд асан Н.Батбаяр буюу \”фортуна”, \”бөө”, \”согтуу” гэх мэт олон хочтой эрхэм гишүүн дахиад нэг хоч авахад бэлэн болжээ. Тэрбээр өнөөдөр хэлэхэд тун хөгийн нэгэн хэлэлцэх асуудал оруулж ирэн дэмжүүлэн батлуулсан бөгөөд түүнийг нь сонссон захын хүүхдийн инээд нь хүрч, элэг нь хөшиж байна. Өсөхөөс сурсан үндэсний хэл шиг бид бага балчир байхаасаа л буцааж өгөхөөр зээлж авсан зүйлийг өр хэмээн заалгуулсан. Гэтэл Архангай хэмээх бүхэл бүтэн нэг аймгийг ард иргэдтэй нь төлөөлөөд их хурал сууж байгаа эрхэм гишүүн Н.Батбаяр өр гэдэг үгийг өглөг хэмээн тэнэглэсээр байгаад намынхнаараа дэмжүүлж чадлаа. Намынхан нь ч гэсэн дээ.

Гаднын орнуудаас тодорхой хугацааны дараа буцааж өгөхөөр зээлж авсан өрнүүдээ өглөг хэмээн \”ёоёотов\”. Ингэснээр Монгол Улсын олон улсаас зээлсэн \”Чингис бонд\”, \”Самурай бонд\”, \”Хөгжлийн банкны бонд\”, \”Дим Сам\” бонд, \”Мазаалай\” бондын мөнгөнүүд болон бусад өрүүд бүгд ӨГЛӨГ болж хувирав. Бага балчир наснаас минь эрдэмтэн багш нар маань өглөг бол буцааж өгөх шаардлагагүй буяны хандив тус, өр бол заавал буцааж өгөх ёстой, буцааж өгнө гэж гуйж авсан зүйл хэмээн заасансан. Тэгтэл Эдийн засгийн сайд байсан Н.Батбаяр гишүүн буцааж өгөхгүй юм шиг өглөг ш дээ хэмээв. Түүний хэлснээр, \”Монгол Улс авсан зээлнүүдийнхээ хүүг төлж эхлэх болоогүй, 2017 оноос төлж эхлэх учраас өр биш. Өр бол нэхэгдээд төлж чадахгүй зээл\” хэмээх үгийг ойлгож болох ч одоо ч бай 2017 он ч бай төлөх л ёстой ӨР.

Үүнтэй хэн ч үл маргана. Төрсөн нь үнэн бол үхэх нь үнэн гэдэг шиг авсан нь үнэн бол өгөх нь үнэн. Өгнөө гээд авсан бол өгөх нь гарцаагүй. Тэгтэл өгнө гээд авсан өрийг Өглөг хэмээх яав ч эрүүл хүний шинж бус. Тиймээс Ч.Хүрэлбаатар гишүүний хэлсэнчлэн Н.Батбаяр гишүүнээс айж эхэлж байна, эмнэлэгт нэг үзүүлнэ байгаа гэж зөвлөмөөр байна. Өрийн удирдлагын тухай хуульд нэмэлт өөрчлөлт оруулах тухай хуулийн төслийн танилцуулгаа Н.Батбаяр гишүүн хийх үеэрээ \”Өр гэдэг бол хугацаа хэтэрсэн зээлийг хэлдэг. Монгол Улсын хувьд хугацаа хэтэрсэн зээл болон өр байхгүй. Тиймээс өр гэдэг ойлголтыг зөв хүргэх үүднээс энэ хуульд өөрчлөлт оруулж байна. \”Өр” гэдэг үгийг \”Өглөг” гэдэг үгээр солих саналтай байна” гэсэн юм. Харин гишүүдийн зүгээс энэ үгийг солих нь ач холбогдолгүй гэсэн байр суурь илэрхийлж байв. 

Тухайлбал Д.Эрдэнэбат гишүүн \”Өрийн удирдлагын тухай бус Өглөгийн удирдлагын тухай хууль болох уу” гэхэд Н.Батбаяр гишүүн \”Үг гэдэг цаанаа утгатай учиртай зүйл\” өр гэж ярихгүй өглөг хэмээн яривал гоё гэх ухааны юм ярьсаар санал хураалт явуулахад гишүүдийн олонх нь дэмжиж, \”Өр\”-ийн удирдлагын тухай хуульд нэмэлт, өөрчлөлт оруулах тухай болон холбогдох бусад хуулийн төслүүдийг хэлэлцэх нь зүйтэй гэж үзлээ. Товчхондоо, Өглөгийн удирдлагын тухай хууль болон холбогдох бусад хууль болох гэж байна. Ингэснээр Монгол Улсад ӨР хэмээх үг ӨГЛӨГ гэдэг үгээр солигдоход бэлэн боллоо, битгий гайхаарай Та бүхэн. Үгүй ээ нээрээ амьд явахад их юм үзэх юм аа. Ийм ч хууль тогтоогчид байх гэж. Ийм ч хууль байх гэж. Өр гэдэг зүйлийг өглөг хэмээн элийрсэн хуулийн төслийг ХУУЛЬ болгоно гээд эрх баригчид нь олонхиороо хүч түрэн баталж ч байх гэж. Төсвийн байнгын хорооны хуралд ганцаар сууж буй Ч.Хүрэлбаатар хэмээх сөрөг хүчний гишүүн ч ингэж бухимдах нь аргагүй. ӨР гэдэг зүйлийг ӨГЛӨГ хэмээн тэнэгтэх нь тэгээд зүгээр зүйл үү.