МУИС-ийн ОУХНУС-ийн нэрэмжит ”Зүүн Хойд Азийн Оюутны Дугуй Ширээ” клубээс жил бүр уламжлал болгон зохион байгуулж, нийт 16 үеийн турш 8 долоон хоног үргэлжилдэг ”Политика” цэрэг стратеги, гадаад бодлогын тэмцээн МУИС-ийн номын санд нээлтийн хурлаар эхлэв. Энэхүү нээлтийн хурлаар ОУХНУС-ийн захирал С.Баттулга, ОУХНУС-ийн багш, доктор С.Баясгалан нар урилгаар оролцон тэмцээнийг зохион байгуулж байгаад талархлаа илэрхийлэхийн сацуу “Политика” тэмцээнд оролцож буй нийт төлөөлөгчдөд амжилт хүслээ.
Политика ертөнц нь өнөөгийн улс орнуудын бодит нөхцөл байдал дээр тулгуурласан зохиомол улсуудыг удирдаж, тухайн улсын цэрэг стратеги, улс төр, гадаад бодлогын шийдвэрийг 16 үеийн турш гаргах өөр нэгэн дэлхий юм. Өөрийн улс орныг хөгжүүлж, олон улсын харилцаан дахь мэдлэг туршлагаа хэн практик дээр сайн буулгаж байна, тухайн хүн ялах боломжтой юм.
