Н.Батцэрэгийг сайдаар нь үлдээж, М.Сономпилийг Батлан хамгаалахын сайдад \”томилно\”

Ерөнхий сайд Ч.Сайханбилэгээр тэргүүлүүлсэн Шийдлийн гэх тодотголтой Засгийн газрын ээлжит хуралдаан дуулиан шуугиантай болж өнгөрлөө. Уг хурлаар төлөвлөсөн 20 асуудлыг хэлэлцэхээс гадна эвслийн бүлгийг бүрдүүлж байсан МАХН-ын засагт ажиллаж байгаа сайд нарыг суудлаас нь чөлөөлөх шийдвэрийг гаргасан юм. 

Тодруулбал, Монгол Улсын Ерөнхий сайд Ч.Сайханбилэг өчигдөр АН-ын дарга З.Энхболд, УИХ дахь АН-ын бүлгийн дарга Б.Гарамгайбаатар, намын ерөнхий нарийн бичгийн дарга Л.Эрхэмбаяр нарт хандан эвслийн бүлгийн сайд нар болох Шадар сайд Ц.Оюунбаатар, Барилга, хот байгуулалтын сайд З.Баянсэлэнгэ, Батлан хамгаалах яамны сайд Ц.Цолмон нарыг албан үүргээс нь чөлөөлөх шийдвэр гарав. Ямартаа ч бүх зүйл төлөвлөгөөний дагуу өрнөж байна. Энэ сарын эхээр МАХН-ын нэр бүхий гишүүд бүлгээсээ болон намаасаа гарч УИХ-д эвсэж орсон МҮАН-ыг орхин одсон. Ингэснээр найман хүний бүрэлдэхүүнтэй болоод байсан эвслийн бүлгийн тоо тав болж УИХ-д бүлэг байгуулах эрхээ албан ёсоор алдсан юм. 

Эвслийг задарсан даруйд АН-ынхан дотроо МАХН-ын гишүүдийг ойрын өдрүүдэд үүрэгт ажлаас нь чөлөөлж дараагийн сайд нарыг нэн даруй томилох нь талаар хэлэлцэж эхэлсэн. Бид энэ өмнө нь энэ талаар мэдээлж байсан юм. Гэвч ЗГХЭГ-ын дарга С.Баярцогт \”эвслийн бүлэг задарсан ч гэсэн Засгийн газрын үйл ажиллагаанд нөлөөлөхгүй. Мөн Засгийн газар эрх зүйн чадамжтэй хэвээрээ байгаа” хэмээн мэдэгдэл хийж байсан ч өчигдөр хуралдаад ийнхүү МАХН-ын гурвыг \”хөөж” гаргах шийдвэр гаргачихлаа. Ер нь МАХН-ын гурван сайдыг \”хөөж” гаргах шийдвэрийг Ерөнхий сайд хүссэн хүсээгүй гаргах байсан нь тодорхой. Өнгөрсөн долоо хоногт ЭМС-ын сайдыг АН дотроосоо томилсоноор дээрх үйл явц шулуудаж эхэлсэн юм. Ерөнхий сайд гурван сайдаа үүрэгт ажлаас нь чөлөөлөх асуудлыг ойрын өдрүүдэд УИХ-д өргөн барина хэмээн албан бичигтээ дурджээ. УИХ ч уг асуудлыг дэмжих нь байх.

Харин одоо тэдний оронд хэнийг сайдын суудалд сарын хугацаатай суулгах вэ. Эх сурвалжуудын мэдээлж буйгаар АН-ынхан гомдолтой байгаа фракциуддаа хувааж өгөх гэнэ. Эсвэл Ерөнхий сайд толгой мэдэж кабинетээ бүрдүүлэх магадлалтай. Шинэ сайд нарын нэрсийг АН-ынхан маш нууцалж байгаа бөгөөд зөвхөн дарга нар нь л хоорондоо ярилцсан гэнэ. Тэгвэл эх сурвалжуудын мэдээлж буйгаар АН-д шинээр элсэж \”дагаар” орсон МҮАН-ын Н.Батцэрэг, М.Сономпил нарыг зүгээр суулгахгүй аж. Н.Батцэрэгийг нь Байгаль орчин ногоон хөгжлийн сайд хэвээр нь үлдээж, М.Сономпил гишүүнийг АН-д элсэж орсонг нь \”шагнаж” Батлан хамгаалахын сайдаар томилохоор ярилцжээ. 

Ямартай ч баттай эх сурвалжийн мэдээлж буйгаар АН дотроосоо шинэ сайдуудыг томилох бөгөөд З.Баянсэлэнгэ сайдын хашиж байсан Барилга хот байгуулалтын сайдад \”Фортуна” Н.Батбаярын талынханаас буюу МҮДН фракциас томилох бололтой. Шадар сайдад харин Шонхор фракцийн хэн нэгнийг томилохоор тохирчээ. Өөрөөр хэлбэл З.Энхболдын өөрийн хүмүүсээс нэгнийг нь томилох гэнэ. 

Сайд нарын томилгооноос ерөнхийдөө АН-ын дотоод зөрчилдөөн улам ширүүсч үү аль эсвэл намын дарга нь фракциудаа \”базаж” чадсан уу гэдэг нь тодорхой болно. Мөн Ерөнхий сайдын эрх мэдэл бүрэн  утгаараа хэрэгжиж байгаа эсэхийг ч харж болох юм. Дашрамд дурдахад томилгооны тойргоос гадуур үлдэж мэдэх фракци нь \”Алтангадас”. Ямартаа ч АН-ынхан дор бүрнээ шинэ сайдуудаа томилох талаар ярилцаж тохирсан байна.