Нийслэл хотын Засаг дарга бөгөөд Улаанбаатар хотын захирагч С.Батболдыг огцруулах эсэхийг өнөөдөр хэлэлцэнэ. НИТХ түүний ажлыг 80 хувийн биелэлттэй байгаа гэсэн дүгнэлтийг танилцуулсан. Гэвч МАН-ын Удирдах зөвлөлөөс түүнийг огцруулах санал гаргаж, Ерөнхий сайд У.Хүрэлсүхийн зүгээс ажлаа өг гэсэн шаардлагыг хүргүүлсэн юм.
Ерөнхий сайдын шаардлагыг НИТХ-ын ээлжит бус V хуралдаан /өнгөрөгч баасан гараг/ хэлэлцсэн ч НИТХ дахь намын бүлгүүд завсарлага авах хүсэлт гаргаснаар хурлыг 2018.11.27-ны өдөр хүртэл хойшлуулсан.
Хотын даргыг огцруулах асуудалд НИТХ-ын гишүүд дараах байр суурийг илэрхийлэв.
НИТХ-ын төлөөлөгч, Хотын дарга асан Э.Бат-Үүл “Ерөнхий сайд хотын даргыг огцруулах тухай саналыг тавьж байгаа асуудал нь нийслэлийн засаг захиргааны түүхэнд анх удаа болж байна. Ийм улс төрийн үйл явц урд нь болж байсан түүх байхгүй. Ерөнхий сайд, нийслэлийн Засаг дарга хоёр өөр өөр намын харьяалалтай байхад ч ийм зүйл болж байгаагүй. Энэ нь хуулийн дагуу зөв явахгүй бол маш ноцтой зүйл болно. Нутгийн өөрөө удирдах ёсны байгуулллага үндсэн хуулийн институтын эрх хэмжээг дордуулсан хэрэг болно. Монгол Улсыг Ерөнхий сайдаас НИТХ төлөөлөгч бид асуулт асууж, хариулт авах эрхтэй. НИТХ-ын төлөөлөгч бол иргэдээсээ сонгогдсон хүмүүс. Иймд ээлжит бус хуралдаанд Монгол Улсын Ерөнхий сайд оролцох ёстой” гэсэн юм.
Харин НИТХ дахь МАН-ын бүлгийн дарга асан С.Мөнхчулуун “Ирэх оны төсөв хэлэлцэх гэж байгаа тул 14 хоногийн завсарлага авах санал тавьсан. Ингээд хоёр намын бүлэгтэй зөвшилцсөний эцэст хуралдааныг хойшлуулсан. Харин өнөөдөр уг асуудлыг хэлэлцэхийн тулд хуралдаанд Ерөнхий сайд У.Хүрэлсүх оролцох ёстой. Гэвч оролцох эсэх нь тодорхойгүй байна” гэв.
Хурал 14.00 цагт эхлэхээр товлосон. Гэвч УИХ-ын байнгын хороодоор Засгийн газрыг огцруулах эсэх тухай асуудлыг давхар хэлэлцэж байна. Ийм үед Ерөнхий сайд НИТХ-ын хуралд ирж оролцох эсэх нь тодорхойгүй.
НИТХ дахь АН-ын бүлэг “огцруулах саналыг тавьсан Ерөнхий сайд өөрөө хуралд ирж тайлбар тавих ёстой” гэсэн саналыг тавьж, завсарлага авсан. Хэрвээ Ерөнхий сайд ирэхгүй бол асуудал дахин хойшлох уу, эсвэл хэлэлцээд явах уу гэдэг нь тодорхойгүй байна. Мөн НИТХ 11 дүгээр сарын 29-нд Нийслэлийн ирэх жилийн төсвийг хэлэлцэн батлах учиртай. Гэтэл хотын даргыг огцруулах эсэх асуудлаас болоод төсвийн асуудал ч мөн хойшлож мэдэхээр байна.
