УИХ-ын гишүүд 60 хувийн ирцтэй Засгийн газрыг огцруулах эсэх асуудлыг хэлэлцэхээр цуглаад байна. Харамсалтай нь Засгийн газрыг огцруулахаар гарын үсэг цуглуулсан гишүүд чуулганы хуралдаанд ирэлгүйгээр төрийн ажлыг гацааж байна. Энэ асуудлаар УИХ-ын гишүүн Ж.Батзандан өөрийн байр суурийг илэрхийлж хэвлэлийнхэнд мэдэгдэл хийв.
Тэрээр “УИХ-ын дарга М.Энхболд Засгийн газрыг огцруулж чадахааргүй болсон учраас чуулганы хуралдааныг хаяж явсан гэж би хувьдаа бодож байна. Мөн Ёс зүйн дэд хороог хуралдуулья гэж өнөөдөр гэнэт ухаан орсон юм шиг шийдвэр гарлаа. Өнгөрсөн зун Л.Оюун-Эрдэнэ гишүүн бид хэд 60 тэрбумын асуудлаар Ёс зүйн дэд хороог хуралдуулья гэж гүйгээд хуралдуулж чадаагүй. Мөн Б.Хурцтай холбоотой асуудал, УИХ-ын нэр бүхий гишүүний холбогдсон хүчингийн хэрэгтэй холбоотой асуудлаар Ёс зүйн дэд хороог хуралдуулах хүсэлтийг хоёр жил тавиад УИХ-ын дарга хүлээж аваагүй. Гэтэл өнөөдөр гэнэт ухаан орж Ёс зүйн дэд хороог хуралдуулна гээд чуулганы хуралдааныг хууль бусаар хааж, зугтаад олдохгүй байна. Хаана байгааг нь мэдэгдэхгүй байна. М.Энхболд даргыгаа бид хайгаад явж байна. УИХ-ын дарга алга болсон тохиолдолд дэд дарга хурлыг удирдаад явах боломжтой. Гэхдээ Монголын ард түмнээс Их хурлын дарга М.Энхболдыг олоход туслаач ээ гэж хүсч байна. Монголын төр үнэхээр ичгэвтэр байдалд орчихлоо… Хурал дээр С.Бямбацогт гишүүн Ёс зүйн дэд хороог хуралдуулья гэдэг горимын санал гаргасан. Горимын саналаар Их хурлын гишүүд заавал санал хурааж байж шийдвэр гаргадаг шүү дээ. Гэтэл шийдвэр гаргалгүйгээр хурлын дарга алхаа цохиод өөрөө гүйгээд гараад явсан. Би гайхаад байгаа юм. Ямар дүрэм журам үйлчилчих вэ… Их хурлын дарга нь хурлаа хаяад явж байсан түүх дэлхийн түүхэнд байхгүй” гэж мэдэгдэв. УИХ-ын гишүүн Ж.Батзанданы мэдэгдлийн дэлгэрэнгүйг доорх бичлэгээс үзнэ үү.
