2018 оны 9 дүгээр сард болсон ОХУ-ын Якутск хотын даргын сонгуульд санаандгүй байдлаар Сардана Авксентьева гэгч эмэгтэй ялалт байгуулж мэр болсон. Тэрээр сонгуулийнхаа сурталчилгааны үеэр хотын тансаг эд хөрөнгийг зарж олсон орлогыг нь хотын сайн сайхны үйлсэд зарцуулна гэж ярьж байсан бөгөөд хотын дарга болмогцоо амлалтаа хэрэгжүүлж эхэлсэн байна. Тухайлбал, хотын хэрэгцээнд байсан бүх тансаг зэрэглэлийн жийп машинуудыг дуудлага худалдаагаар борлуулж хурган дарга нарыг хотын балансад бүртгэлтэй УАЗ-469 машинуудыг ашиглахыг үүрэгджээ.
Шууд цасан дээр асфальт дэвсэж байсан замын компанид хотын дарга Сардана Авксентьева “Мөнгийг чинь өгөхгүй. Гэрээг чинь цуцаллаа!” гээд шууд шийдвэр гаргаж олныг алмайруулсан.
Нэрт загвар зохион бүтээгчид төсөвлөсөн мөнгөний зориулалтыг өөрчилж тэр мөнгөөр нь сургуулиудад агаар цэвэрлэгч төхөөрөмж авч, маш үнэтэй тоглогдох байсан балетын тоглолтыг цуцалж хэмнэсэн мөнгөөр нь номын сан, хүүхдүүдийн үндэсний урлагийн төвд зориулж ашигласан.
Орлогчдынхоо орон тоог цөөрүүлсэн. Шинэ жилээр орлогчид, захиргааны хурган дарга нар өнчин хүүхдүүдийн асрамжийн газар, өндөр настнуудын асрах газрын Шинэ жилийн баярыг зохион байгуулах сайн үйлсийн аян хийхийг үүрэгдсэн хотын даргын шийд гарсан байна. Энэ эмэгтэйн гавьяаг бичээд байвал цөөнгүй юм байна.
Улаанбаатар хотын шинэ даргыг сонгох гэж байгаа энэ мөчид НИТХ-ын төлөөлөгчдөд захих зүйл байна аа. Хотод төрж өссөн хүнийг сонгоорой. Мөн зоригтой, санаачлагатай, дайчин хотын дарга сонгоорой.
Шинэ хотын дарга, сайн хуулийн зөвлөхтэй байх хэрэгтэй. Тэгээд хотын утаанаас авахуулаад Нарантуул, 100 айлыг нүүлгэх шийдвэрүүдийг гаргаж чадах хоншоортой хүнийг сонгоорой. Улаанбаатар хотын энэ замбараагүй байдалтай чанга гараар үзэхээс өөр арга байхгүй. Магадгүй хүний эрх зөрчих тохиолдолд гарахыг үгүйсгэхгүй.
