Шүд эрүүл бол бие эрүүл гэдэг. Манай улс 2019 онд 50 тэрбум төгрөгийн хөрөнгөөр хүүхдийн шүдийг эрүүлжүүлэх ажлыг хийх гэж байна.
Маш хэрэгтэй арга хэмжээ гэдгийг хүлээн зөвшөөрч байна. Гэхдээ Эрүүл мэндийн даатгалын хөрөнгөөр С вирусын оношлогоо хийх болсоноор лаброториуд мөнгөний төлөө уралцаж, эцэст нь янз бүрийн хэл аманд өртөж байсан шиг эрүүл шүд хөтөлбөрийн 50 тэрбум төгрөгийг сонгуулийн шоу болгож, эмх замбараагүй бужигнуулж, эцэст нь шүдний эмнэлгүүдийн халдвар хамгааллын горим алдагдвал хүүхдийн эрүүл мэндэд нөхөж баршгүй хохирол учирна гэдгийг сануулахад илүүдэхгүй байх хэмээн Эрүүл мэндийн сайд асан С.Ламбаа өөрийн цахим хуудаснаа бичжээ.
Энэ бол маргаангүй үнэн юм. Хүүхдийн гэлтгүй бүх нийтийн шүдний өвчлөлд анхаарлаа хандуулах цаг болсон. Шүдний өвчин бол ядуусын өвчин гэгддэг. Бүх нийтээрээ шүдний асуудалтай бол иргэд бус манай орон өөрөө ядуу байна гэж дэлхий нийтэд харагдана. Тиймээс энэ төсөл хөтөлбөрийг хэрэгжүүлэхэд яам, холбогдох газрууд эртнээс бэлтгэл ажлыг нь хангаж, маш нарийн тооцоо судалгаатай хийж, графикийн дагуу үр дүнтэй, зөв зохион байгуулалттай, хатуу хяналттай явуулах хэрэгтэй. Эцэг эхчүүд ч хүүхдийнхээ эрүүл мэндийн төлөө онцгой анхаарч, эмч сувилагч нартай хамтран ажиллавал зохино.
Шүдний өвчлөл нь маш олон өвчний эх үүсвэр болдог учраас хүүхдүүдийн эрүүл мэндийг хамгаалахад хамгийн түрүүнд шүднээс нь эхлэх ёстой юм. Тэгэхээр энэ ажил бол зөвхөн шүд бус бусад бүхий л өвчний голомт, суурийг устгах өндөр ач холбогдолтой гэдгийг ойлгож, ядаж энэ хөтөлбөрийн мөнгөнөөс идэлгүйгээр үйл ажиллагаанд нь зарцуулаасай гэж хүсч байна.
