УИХ-ын дарга М.Энхболдыг албан тушаалаас нь огцруулахаар нэр бүхий 40 гишүүн нэгдэж, гарын үсэг зурлаа. Тэд УИХ-ын дарга М.Энхболдыг Үндсэн хууль зөрчсөн, 60 тэрбумын хэрэгт нэр холбогдсон зэрэг хэд, хэдэн үндэслэл тавьж, ажлаа хүлээлгэж өгөхийг шаардаж байгаа бол Ерөнхий сайд У.Хүрэлсүх 60 тэрбумын хэргээр нь Үндсэн хуулийн Цэцэд хандаад байгаа юм. УИХ-ын дарга М.Энхболдыг албан тушаалаа хүлээлгэж өгтөл дээрх нэр бүхий 40 гишүүн байнгын хороо болон чуулганы нэгдсэн хуралдаанд оролцохгүй гэсэн байр суурин дээрээ хэвээр буйгаа дахин мэдэгдлээ.
УИХ-ын дарга М.Энхболд тэднийг хуулийн хүрээнд огцруулах асуудлаа тавихыг шаардаж байгаа юм. Тэгвэл УИХ-ын нэр бүхий 40 гишүүн өнөөдөр /2018.12.13/ шаардлагыг албажуулж, гарын үсэг зуран, УИХ-ын дарга М.Энхболдыг огцруулах бичгийг өөрт нь өргөн барилаа. Ингэснээр УИХ-ын дарга М.Энхболд албан тушаалаа хүлээлгэж, огцрох нөхцөл бүрдэж байна. Учир нь, УИХ-ын даргыг огцруулахаар нэр бүхий 40 гишүүн гарын үсгээ зурж, парламентад өргөн барьсан энэ тохиолдолд хуулийн хугацаанд намын бүлэг, байнгын хороо, чуулганы нэгдсэн хуралдаанаар огцруулах эсэх асуудлыг хэлэлцэн шийдвэрлэх юм.
Хэдийгээр хуульд тусгаагүй ч УИХ-ын даргыг танхимынх нь гишүүдийн 50 хувиас илүү нь хүлээн зөвшөөрөөгүй тохиолдолд УИХ-ын дарга огцрох үндэслэл бүрддэг талаар гишүүд ярьж байна. (Гишүүдийн БАЙР СУУРЬ-ийг унших)
ХУУЛИЙН ЗААЛТ
Монгол Улсын Их хурлын тухай хуулийн хоёрдугаар бүлгийн 10 дугаар зүйлд УИХ-ын даргын бүрэн эрхийн хугацаа, түүнийг хугацаанаас нь өмнө чөлөөлөх, огцруулах үндэслэлийг хуульчилж өгсөн байдаг аж.
10.1. Улсын Их Хурлын даргын бүрэн эрхийн хугацаа дөрвөн жил байна.
10.2. Дор дурдсан тохиолдолд Улсын Их Хурлын даргын бүрэн эрх энэ хуулийн 10.1-д заасан хугацаанаас өмнө дуусгавар болно;
10.2.1. Нас барсан,
10.2.2. Өөр ажилд шилжих болон бусад шалтгаанаар чөлөөлөгдөх хүсэлтээ өөрөө гаргасныг Улсын Их Хурал хүлээн авсан,
10.2.3. Хүндээр өвчилсний улмаас цаашид үүрэгт ажлаа гүйцэтгэх боломжгүй болсон тухай эмнэлгийн дүгнэлт гаргасныг Улсын Их Хурал хүлээн авсан,
10.2.4. Үндсэн хуулийн цэц Улсын Их Хурлын даргыг огцруулах үндэслэлтэй гэсэн дүгнэлт гаргасныг Улсын Их Хурал хүлээн авсан,
10.2.5. Гэмт хэрэг үйлдсэн болох нь шүүхийн хүчин төгөлдөр шийтгэх тогтоолоор батлагдсан.
10.3. Улсын Их Хурлын даргыг чөлөөлөх, огцруулах асуудлыг Төрийн байгуулалтын байнгын хорооны санал, дүгнэлтийг үндэслэн нэгдсэн хуралдаанаар хэлэлцэж хуралдаанд оролцсон гишүүдийн олонхийн саналаар, нууц санал хураалтаар шийдвэрлэнэ.
10.4. Энэ хуулийн 10.2.2, 10.2.3-т заасан тохиолдолд Улсын Их Хурлын даргыг чөлөөлөх, 10.2.4, 10.2.5-д заасан тохиолдолд огцруулах тухай тогтоол батална.
10.5. Улсын Их Хурлын даргыг чөлөөлөх, огцруулах асуудлыг нам, эвслийн бүлэг хуралдаанаараа хэлэлцэж санал, дүгнэлт гарган нэгдсэн хуралдаанд танилцуулж болно.
10.6. Гишүүд Байнгын хороо, нам, эвслийн бүлгийн болон нэгдсэн хуралдаан дээр Улсын Их Хурлын даргыг чөлөөлөх, огцруулах асуудалтай холбогдуулан асуулт тавьж хариулт авах, үг хэлж байр сууриа илэрхийлэх эрхтэй.
10.7. Улсын Их Хурлын даргыг чөлөөлөх, огцруулах асуудлыг хэлэлцэх нэгдсэн хуралдааныг олонхийн буюу хамгийн олон суудал авсан нам, эвслийн бүлгээс нэр дэвшиж сонгогдсон дэд дарга даргална.
WWW.ZINDAA.MN
