Хүйтний улирал, агаарын бохирдол гээд бидний үр хүүхдүүд өвдөхгүй өнгөрөх арга алга. Гэвч өвдлөө гэхэд дүүргийн хүүхдийн эмнэлгүүд ачаалал ихтэй, ор байхгүй. Аргаа барсан эцэг эхчүүд шал дээр ч хамаагүй гудас дэвсээд хүүхдээ эмчлүүлж байна. Энэ асуудлыг шийдвэрлэхийн тулд бидэнд олон тооны хүүхдийн эмнэлэг хэрэгтэй. Гэвч төсвийн хөрөнгөөр нэг дор олон эмнэлэг барих боломжгүй. Тиймээс өнөө маргаашдаа гудсаа дэвсээд л хүүхдээ эмчлүүлэхээс өөр аргагүй хүрээд байна.
Тэгвэл энэхүү бэрхшээлд бага ч болов тус дэм болохоор Ц.Элбэгдоржийн хүү Эрдэнэ дүүргийн нэгдсэн эмнэлгүүдэд 80 ширхэг эвхдэг ор хандивласан байна. Энэ талаар тэрээр өөрийн цахим хуудаснаа
“… Өнөөдөр бага насны хүүхдүүдийн дундах амьсгалын замын өвчлөл маш өндөр байгаагаас шалтгаалж, дүүргийн эмнэлгүүд хэвийн хэмжээнээс 3 дахин илүү ачаалалтай ажиллаж байна. Энэ ид ачааллаас болж хэвтэн эмчлүүлэх зайлшгүй шаардлагатай хүнд өвчтэй хүүхдүүдэд ор хүрэлцэхгүйгээс коридорт шалан дээр хэвтэж байна. Иймээс дүүргийн нэгдсэн эмнэлгүүдэд нийт 80 эвхдэг орыг хандивлалаа. Бидний хүүхдүүдийн эрүүл мэндийн төлөө цаг наргүй, хариуцлагатай ажиллаж байгаа цагаан нөмрөгт баатруудаараа маш их бахархаж байна. Хүүхэд багачууд маань эрүүл энх өсөх болтугай” гэж бичжээ.
80 ширхэг ор хаанаа ч хүрэхгүй. Гэхдээ л бага ч болов дэм болно. Баярлалаа Э.Эрдэнээ.
