Өчигдөр Монголын морин спорт, уяачдын холбоо /ММСУХ/-ны ээлжит VII их хурал “Эв нэгдэл-хамтын шийдэл” уриан дор болж шинэ ерөнхийлөгчөөр Цогтын Батсайханыг сонгожээ. Тус холбооны ерөнхийлөгч УИХ-ын дарга М.Энхболд үүрэгт ажлаа хүлээлгэн өгснөөс хойш түр орлон гүйцэтгэгчтэй байсан билээ.
Ингээд Төв аймгийн Батсүмбэр сумын уугуул Ц.Батсайханыг олонхийн саналаар дэмжиж холбооны ерөнхийлөгч болголоо. Ц.Батсайхан нь Монгол Улсын тод манлай уяач бөгөөд 2018 оны 7 дугаар сараас хойш “Эрдэнэс Монгол” ХХК-ийн Нэгдсэн удирдлага хариуцсан дэд захирал алба хашиж яваа нэг. Өмнө нь тэрээр ХХААХҮЯ-ны Тариалан эрхлэлтийг дэмжих сангийн даргаар ажиллаж байсан. Ц.Батсайханыг уяач гэхээсээ Айзам хамтлагийн дуучин гэдгээр нь Монголчууд сайн мэддэг.
Харин түүний дүү Ц.Бат-Энх нь ГОК-ийн Хүний хөгжлийн асуудал хариуцсан захиралаар ажиллаж байгаад өдгөө МАН-ын нарийн бичгийн даргаар ажиллаж байгаа. Мөн “Симба” Ц.Батаа гэх ахыг нь хүмүүс бүр л сайн мэддэг.
Уншигч та бүхэнд Ц.Батсайханы товч намтарыг танилцуулья
Боловсрол:
1990-1994 онд ОХУ-ын Новосибирск хотын Их Сургуульд суралцаж, эдийн засгийн мэргэжил эзэмшсэн.
1988-1992 онд Соёл, Урлагийн Их Сургуульд суралцаж, төгссөн.
1975-1985 онд Улаанбаатар хотын 10 жилийн 40 дүгээр дунд сургуульд суралцсан
Ажлын дадлага, туршлага:
2018 оны 7 дугаар сараас хойш “Эрдэнэс Монгол” ХХК-ийн Нэгдсэн удирдлага хариуцсан дэд захирал
2011-2012 онд Хүнс, Хөдөө Аж Ахуй, Хөнгөн Үйлдвэрийн Яамны Мал хамгаалах сангийн Гүйцэтгэх захирал
2008-2011 онд Хүнс, Хөдөө Аж Ахуй, Хөнгөн Үйлдвэрийн Яамны Тариалан эрхлэлтийг дэмжих сангийн Гүйцэтгэх захирал
2007-2008 онд Улаанбаатар хотын Багахангай дүүргийн Мах боловсруулах үйлдвэрийн Гүйцэтгэх захирал
2004-2007 онд “Симба” группын Ерөнхийлөгч
1995-2004 онд “Цагаан Ноён” ХХК-ийн Ерөнхий захирал
