Ч.Сайханбилэг: Засгийн газар бус \”Эрдэнэс Тавантолгой\” компани бонд босгоно

 

Засгийн газар энэ сарын 9-ний
ээлжит бус хуралдаанаараа \”Эрдэнэс Тавантолгой” ХК-ийн иргэдэд өмчлүүлсэн 1072
ширхэг хувьцааны 30 хувийг мөнгөжүүлэх шийдвэрийг гаргасан. Ингэснээр иргэд
1072 ширхэг хувьцааныхаа 322 ширхэгийг 300 мянган төгрөгөөр улсдаа зарж
болохоор болсон.

Хувьцаагаа зарах хүсэлтэй
иргэдийг энэ сарын 13-наас эхлэн арилжааны банкуудаар дамжуулан бүртгэсэн
бөгөөд 322 ширхэг хувьцаагаа худалдах хүсэлтэй иргэд банкинд урт дараалал
үүсгээд байсан юм. Өнөөдрийн байдлаар 18 хүртэлх насны хүүхдүүдийг
оролцуулалгүйгээр нэг сая 650 мянган иргэн 1072 ширхэг хувьцаа эзэмшиж байна.
Эдгээр иргэдийн 80 хувь нь хувьцаагаа зарна гэсэн тооцоог Засгийн газар
гаргажээ.

Хувьцаа худалдан авахад Засгийн
газар 400 тэрбум төгрөгийн бонд босгох шаардлагатай талаар Ерөнхий сайд
мэдээлсэн.

Бонд босгох асуудалд Монгол
Улсын Ерөнхий сайд Ч.Сайханбилэг \”Энэ бол Засгийн газрын бонд биш.
\”Эрдэнэс Таван толгой” компани бонд гаргаж байгаа. \”Эрдэнэс Таван толгой”
компанид хөрөнгө оруулалт нь ороод энэ төсөл хөтөлбөр цаашдаа явна. Энэ
хөтөлбөрөөсөө бид иргэн бүртээ эзэмшүүлсэн 1072 ширхэг хувьцаагаа мөнгөжүүлээд
явчих бүрэн бололцоотой. Бондын эргэн төлөлт гэдэг нь компани 15-20 жилийн
дараа олох ашгаа түрүүлээд авч байна гэсэн үг\” гэсэн тайлбарыг өгчээ.