![\"\"](http://undesten.mn/uploads/posts/2016-06/1466061141_c6a44dd6cd42ab61great.jpg "\\"\\"")
Нийслэлийн Засаг дарга бөгөөд Улаанбаатар хотын захирагч, Нийслэлийн АН-ын дарга Э.Бат-Үүл газрын наймаа, хууль бус газар олголт болон цаг үеийн асуудлаар байр сууриа илэрхийлж мэдээлэл хйлээ. Хэвлэлийн хуралд НИТХ-ын дарга Д.Бат-Үүл болон ИТХ-ын төлөөлөгчид оролцсон юм.
Нийслэлийн Засаг дарга бөгөөд Улаанбаатар хотын захирагч, Нийслэлийн АН-ын дарга Э.Бат-Үүл \”Өнөөдөр бид хоёр шалтгаанаар хэвлэлийн хурал зарлалаа. Нэгдүгээрт, сүүлийн үед нэр дэвшигчдийг ёс бусаар, гүжирдэх, шантаажлах үйл ажиллагаа маш их газар авч байгаа. Үүнтэй холбогдуулан Ардчилсан намын нэр дэвшигчид, тэр дундаа НИТХ-д нэр дэвшиж байгаа 45 төлөөлөгч болон сонгогчдод сонор сэрэмжтэй байхыг уриалах нь зүйтгэй гэж үзсэн. Хоёрдугаарт, манай баг, миний бие рүү газрын авлига наймаагаар хөлжсөн, нийслэлийг удирдаж байсан бүлэглэлийн зүгээс маш их хүчтэй гүтгэлэг дайралтыг эрчимжүүлэх боллоо.
Хамгийн гол асуудал нь манай ард олны дунд \”газрын мафи” гэж нэрлэгдсэн бүлэг этгээдүүдийн зүгээс алдагдсан эрх мэдлээ буцаан олж авахын тулд сонгуулийн боломжийг ашиглан улайрсан үйл ажиллагаа явуулж байна. Ард түмний дунд \”газрын мафи” гэж нэрлэгдсэн бүлэглэлийн үйл ажиллагаагаас манай хотод учирч байсан хохирлын зарим баримтыг олон нийтэд дэлгэх нь зүйтгэй гэж үзэж байна. Дэлхийн банкны 2015 оны \”Монгол Улс, Улаанбаатар хотын газрын харилцаа ба менежмент” гэсэн тайлан гарсан. Энэ тайланд Улаанбаатар хотод газрыг дэлхийн жишгээр үнэлж орлого олсон бол ямар хэмжээний орлого олох бололцоотой байсан бэ гэдгийг 2012 он хүртлэх газар олголтын үйл ажиллагаанд судалгаа хийж, тогтоосон.
Энэ дүнгээр үлэмж их хэмжээний орлого алдагдсаныг анх удаа гаргаж ирсэн. Нийт 29.6 их наяд төгрөгийн дүн гарсан. Хэрвээ энэ мөнгө орлого болж орж ирсэн бол Монгол Улсад 26 мянган сургууль, цэцэрлэгийн цогцолбор барих байсан байна. 2030 он хүртэл Улаанбаатар хотыг хөгжүүлэх ерөнхий төлөвлөгөөг хэрэгжүүлэхэд Барилга хот байгуулалтын яам, Нийслэлийн Зураг төслийн хүрээлэнгээс гаргасан тооцооллоор 24 их наяд төгрөг хэрэгтэй гэсэн дүн гарч байсан. 2030 он хүртлэх төлөвлөгөө нь нийслэлийн шинэ хот байгуулах төлөвлөгөө. Тэгэхээр бүхэл бүтэн шинэ хот барих хэмжээний орлого орж ирээгүй байна. Энэ мөнгө хаашаа орсон нь ойлгомжтой.
Ийм их хэмжээний баялгийг хяналтандаа байлгаж байсан бүлэг, газрын наймаачид, мөнгөө төлөөд төрийн байгууллагыг өөрсдийнхөө төлөө ажилуулдаг байсан бүлэглэл тэр боломжийг алдахгүй байхын төлөө улайран, тэмцэж байна. Бид ч ийм зүйл болно гэсэн эрсдлийг тооцож байсан. Тийм ч учраас манай сонгуулийн уриа ухрах уу, урагшлах уу гэж байгаа. Тэр газрын наймаачид эдийн засгийн ямар их хүч чадалтайг манай иргэд мэднэ. Асар их эд баялгийг хяналтандаа авчихсан үнэхээр хүчирхэг хүмүүс. Тиймээс алхам тутамдаа харлуулах, гүтгэх, гүжирдэх, ямар л арга байна тэр бүгдийг хийж байна. Сонгуулийг тэд газрын төлөөх тулалдаан болгож байна. 2012 онд бид олуулаа болж орж ирээд хамгийн түрүүнд газрын наймаг НИХТ-ын тогтоолоор зогсоосон. Газрыг хэн нэгэнд олгох бол НИТХ-ын оруулж зөвшөөрсөн тохиолдолд олгоно гэдэг шийдвэр гаргасан.
Анх удаа Газар олгох журам гаргаж, газрыг хууль бусаар олгосон байвал тухайн Засаг дарга огцроно гэсэн заалтыг оруулсан. Өмнө нь хууль бусаар олгогдсон олон газрын захирамжийг хүчингүй болгож, буцаан хурааж авах үйл ажиллагааг эхлүүлсэн. Гэхдээ их олон асуудал шүүх дээр очиж унасан. Миний гаргасан захирамж шийдвэрийг шүүх хүчингүй болгоод байхаар тохиролцъё, зөвшилцье гээд газрынхаа дуудлага худалдааны анхны үнийг хэл гэсэн. Тэгэхэд хэсэгхэн газрын анхны үнэ 64 тэрбум 493 сая төгрөгийн үнэтэй байсан. Энэ газрууд анхны үнээсээ 2-3 дахин өндөр үнэтэй борлуулагдсан байсан. Мөнгийг нь төлөөд засаг захиргааг өөрийнхөө төлөө ажилуулдаг байсан энэ бүлэглэлтэй тэмцэж байгаа бидний тэмцэл амаргүй байна. Тиймээс сонгогчид сонор сэрэмжтэй байхыг анхааруулж байна. Хууль ёс байг гэхэд хүний ёс зүй мартагдахад хүрч байна” гэлээ.
Тэд мэдээлэл хийснийхээ дараа сэтгүүлчдийн асуултад хариуллаа.
-Яармагийнхан хэзээ Сайн хашаа хөтөлбөрт хамрагдаж эхлэх вэ?
-\”Сайн хашаа” хөтөлбөрт ямар иргэд хамрагдах вэ гэдгийг Засгийн газрын тогтоолоор заачихсан байгаа. Хотын төвийн зургаан дүүрэг, алслагдсан гурван дүүрэг аймаг нийслэлийн сумын төв дэх хашааны газар орно гээд Засгийн газар тогтоолоороо заачихсан байгаа.
-НИТХ-ын дарга Д.Баттулга: Хүүхдийн цэцэрлэг сургууль, биеийн тамирын талбай, хотын төвийн орон сууцны барилгуудын дундах тоглоомын талбай, ахмадуудын нарладаг тэр талбай хамаарсан байдаг. Засаг дарга хэллээ. 200 гаруй газрын зөвшөөрлийг хүчингүй болгосон. Төв шуудангийн урд талын зам, хоёрудгаарт Хангай буудлын орчмын явган хүний талбай, Их монгол гээд рестораны урдах ногоон байгууламжийн талбай, сургуулийн биеийн тамирын талбай зэрэг газруудыг хүчингүй болгосон. Хүүхдийн ордон руу ордог талбай гээд жижигхэн газар байна.
Гэхдээ энэ маш их үнэ цэнэтэй газар. Ордны зүүн талын алга дарам газар 24 тэрбум төгрөгт хүрсэн гэж засаг дарга хэллээ. Гэтэл Чингисийн талбайн эргэн тойронд ямар барилга барьсныг та бүхэн мэднэ. Нэг ч төгрөг хотын төсөвт ороогүй. Тэгэхээр тухайн үеийн засаг даргын гарын үсэг ямар үнэтэй байсан бэ гэдгийг та бүхэн төсөөлөх байх. Ийм зүйлүүдийг өмнө ч бид хэлж байсан, одоо ч бас хэлэх ёстой. Бид хууль бус газрын наймааг зогсоосон гэж бодож байгаа. Гэхдээ хуулийн хүрээнд хийх ажил их байна.
