Хар тамхи, мансууруулах бодисын хамгийн том хэрэглэгч, нийлүүлэгч хоёр том гүрний дунд амьдарч байгаа нь бидний азгүй хувь тавилан гэлтэй. Гэвч хар тамхийг хэрэглэх эсэх нь хувь хүний ухамсрын асуудал юм. Өөрөөр хэлбэл бидний хөрш улсууд хар тамхи хэрэглэдэг байлаа гээд бид заавал хэрэглэх шаардлага алга. Буурай эдийн засагтай энэ улсад хар тамхины хэрэглээ өсвөл халаасан дахь мөнгө гадагшаа урсана л гэсэн үг юм.
Тиймээс нийтээрээ энэ хорт зүйлээс ухамсартайгаар татгалзах ёстой юм. Үүнд олны танил буюу олон залуусын үлгэр дууриалал болж байдаг хүмүүс тодорхой хувь нэмэртэй оролцох учиртай юм. Гэвч эсрэгээрээ…
Урлагийн салбарт олонд танигдсан эрхмүүд үйлдэл дээрээ буюу хар тамхи гэх зүйлийг хэрэглэж байгаад баригдах тохиолдол бүртгэгдсээр байна. Гэвч хэвлэлээр буруутгагдсан олны танил эрхэм бидний дунд хээв нэг алхаж яваа нь манай хууль хар тамхичдад дэндүү зөөлөн ханддаг юм уу гэх ойлголтыг олон нийтэд өгдөг.
Никель Ганбаа гэх “мундаг залуу” мансууруулах төрлийн зүйл хэрэглэж байгаад үйлдэл дээрээ баригдав. Уг нь олон нийт түүнийг хөдөлмөрч “мундаг залуу” хэмээн үнэлээд байлаа. Эцэг эхчүүд ч үр хүүхдээ түүн шиг бол гэж зөвлөж байсан биз. Унадаг дугуй сонирхдог хөвгүүд “яг Ганбаа ах шиг болно” гэж өөрийгөө зоригжуулж байсан гэхэд хилсдэхгүй байх. Гэтэл өнөөх “мундаг залуу” олон нийтийн эзэмшлийн газар автомашин дотор мансуураад сууж байхад нь цагдаа түүнийг барьж саатууллаа.
Одоо яах вэ. Ганбаа сайн залуу учраас нэг удаадаа өршөөгөөд явуулах уу. Эсвэл түүнд хуулийн хариуцлага хүлээлгэж, нийгэмд анхааруулга болгох уу.
Ганбаа шиг олон залуу нийгэмдээ зөвөөр үлгэрлээд явбал сайнсан. Гэвч сайн залуу бүрийн ард хар тамхи гэх муухай зүйл гарч ирээд байхаар итгэл алдарч, хүүхдэдээ үлгэр дууриалал авах олны танил нэгнийг нэрлэж чадахгүйд хүрээд байна шүү.
Хууль хүн бүрт тэгш үйлчлэх учиртай. Ганбаа байна уу, Ганаа байна уу бүгд л хуулийн өмнө тэгш хариуцлага хүлээх нь зөв. Түүнээс олны танил гээд хэргээс мултарчихдаг, олонд танигдаагүй бол ял үүрээд явдаг байж болохгүй.
Гэтэл олны танил эрхмүүд энэхүү үйлдлээ зөвтгөж байгаа мэт сошиал аяныг өрнүүлж байгааг хараад цочирдож орхилоо. Тухайлбал, аялагч Амай буюу Золбаяр өөрийн цахим хуудаснаа дараах сэтгэгдлийг үлджээ.
Түүнийхээр өвс татсан Ганбааг өршөөх ёстой юм байна. Олон улс мансууруулах төрлийн өвсийг хар тамхинаас ялгаж, хэрэглэхийг нь зөвшөөрдөг гэнэ ээ. Энэ юу болж байна вэ. Одоо залуус гадаа гэртгүй мансуураад сууж байх ёстой. Түүнийг нь хуулийн хүрээнд зөвшөөрөх хэрэгтэй гэж хэлэх гээд байна уу. Амай бол бас л олны танил нэгэн. Түүнд олон улс орноор аялах хүсэлтэй хүүхэд залуус бий. Гэтэл дэлхийгээр хэрэн тэнэж, нүд тайлсан түүнийхээр Монголын залуус мансуурах, түүнийг нь хуулиар зөвшөөрөх ёстой гэж үү. Ийм зүйл яавч байж болохгүй. Олонд танигдсан бол та зөвөөр л үлгэрлэ. Хэрвээ тэгэж чадахгүй бол бусадтай адил хуулийн хариуцлага хүлээ.
Мөн энэ цөөн хүн амтай улсад нийтээрээ мансуурч суухыг бус харин нийтээрээ хөдөлмөрлөхийг л үлгэрлэж, уриалмаар байна. АНХААР!!!
