Мансууруулах эм, сэтгэцэд нөлөөт бодистой холбоотой гэмт хэрэг, зөрчлөөс урьдчилан сэргийлэх, хор уршгийг иргэд олон нийтэд таниулах ажлыг эрчимжүүлэх зорилгоор “Анзаар” арга хэмжээг Монгол Улсад Гэмт Хэргээс Урьдчилан сэргийлэх ажлын зохицуулах зөвлөлийн ажлын алба, Нийслэлийн гэмт хэргээс урьдчилан сэргийлэх ажлыг зохицуулах салбар зөвлөл, Засгийн газрын хэрэгжүүлэгч агентлаг ерөнхий газар, Гэр бүл, хүүхэд, залуучуудын хөгжлийн газартай хамтран 2022-2023 оны хооронд зохион байгуулж, аяны үр дүнг хэлэлцэн, өнөөдөр хаалтын ажиллагааг зохион байгууллаа.
Арга хэмжээний хаалтын үйл ажиллагаанд Хууль зүй, дотоод хэргийн яамны Төрийн нарийн бичгийн даргын үүргийн түр орлон гүйцэтгэгч Л.Нямгэрэл, Засгийн газрын хэрэгжүүлэгч агентлаг Боловсролын ерөнхий газрын Суралцагчийн хөгжлийн газрын дарга Ж.Болормаа, Гэр бүл, хүүхэд, залуучуудын хөгжлийн газрын даргын үүрэг гүйцэтгэгч Н.Өлзийхутаг, Сонгинохайрхан дүүргийн Иргэдийн төлөөлөгчдийн хурлын дарга Б.Хуягбаатар, Дархан-Уул аймгийн Иргэдийн төлөөлөгчдийн хурлын дарга С.Насанбат, ЦЕГ-ын Урьдчилан сэргийлэх газрын дарга, цагдаагийн хурандаа Г.Арсланхуяг, Хар тамхитай тэмцэх газрын дарга, цагдаагийн хурандаа Г.Давааням нар оролцож аянаас гарсан үр дүнгийнхээ талаар тайлагнаж санал бодлоо солилцсон.
Аянын хүрээнд төрийн болон төрийн бус байгууллагын 29,690 алба хаагч, ажилтан, их, дээд болон ерөнхий боловсролын сургуулийн 18,840 багш, нийгмийн ажилтан, 24,375 оюутан, сурагч, 24,750 эцэг, эх, асран хамгаалагч, хорихоос өөр төрлийн ял шийтгэгдсэн 325, нийт 1642 удаагийн сургалт зохион байгуулж 97,980 иргэдэд мансууруулах эм, сэтгэцэд нөлөөт бодисын хор уршиг, хэрэглэсэнд хүнд илрэх шинж тэмдэг, сэтгэл зүйн өөрчлөлт, хуулийн хариуцлагын талаар мэдлэг олгох сургалт нөлөөллийн ажлыг зохион байгуулсан.
Сургалт, мэдээллийн ажилд хамрагдсан иргэдэд 97 мянган ширхэг зөвлөмж, сэрэмжлүүлэг тарааж, 5 асуулт бүхий санал асуулгыг цахим (QR код) болон цаасаар авахад 98 орчим хувь нь “Эерэг” үнэлгээ өгч, 11210 хүн талархал илэрхийлсэн байна.
Аяны үр дүнд хар тамхитай тэмцэх газрын фейсбүүк хуудсанд энэ онд 134 иргэн хандан зөвлөгөө, мэдээлэл авч, гэмт хэргийн талаар 36 мэдээлэл ирүүлснийг өмнөх оны мөн үетэй харьцуулахад 23% өсч, мансууруулах эм, сэтгэцэд нөлөөт бодистой холбоотой зөвлөгөө, мэдээлэл өгөх 116 тусгай дугаарын утсанд 122 иргэн хандан зөвлөгөө, мэдээлэл авч 39 иргэн гэмт хэрэг, зөрчлийн талаар мэдээлэл тус тус ирүүлсэн нь иргэд, олон нийтээс цагдаагийн байгууллагад хандах мэдээллийн урсгал нэмэгдэж байгааг харуулж байна.
Цагдаагийн алба хаагчдыг чадавхжуулах чиглэлээр зохион байгуулсан сургалтын үр дүнд энэ оны байдлаар мансууруулах, сэтгэцэд нөлөөт ургамлын тархац бүхий аймгуудын цагдаагийн газраас 33 гэмт хэргийг илрүүлснийг өмнөх оны мөн үетэй харьцуулахад 12 нэгж буюу 63,6% өссөн үзүүлэлтэй байна.
Ахуйн хэрэглээний газ, цавуу, будаг шингэлэгч хэрэглэж мансуурдаг 79 хүүхдийг бүртгэл, хяналтад авч, дүүргүүдийн эрүүл мэндийн төвийн сэтгэц-наркологийн эмч нартай холбон зуучилж, мансууруулах эм, сэтгэцэд нөлөөт бодис хэрэглэхээс урьдчилан сэргийлэх ажлыг зохион байгуулан ажилласан.
Аяны хүрээнд нийслэлийн хэмжээнд идэвх, санаачилга гарган ажиллаж 12.951 хүн хамруулсан Сонгинохайрхан дүүргийн иргэдийн төлөөлөгчдийн хурлын даргад, 21 аймгийн хэмжээнд хамгийн олон удаагийн сургалтыг зохион байгуулж 7421 хүн хамруулсан Дархан-Уул аймгийн иргэдийн төлөөлөгчдийн хурлын даргад тус тус талархал гардууллаа.
