Өнөөдөр “УБТЗ” ХНН-ээс 2014-2016 онд тус нийгэмлэгийн даргаар ажлласан Л.Пүрэвбаатар нийгэмлэгийн мөнгөөр барьсан хаусаа суллаж өгөхгүй байгаа талаар мэдээлэл хийлээ. Л.Пүрэвбаатар нийгэмлэгийн 1.5 тэрбум төгрөгөөр Зайсанд хувийн хаус бариулж, одоо ч эзэмшиж байгааг хууль бус хэмээн үзэж, шүүхэд хандсан бөгөөд тус хаусыг нийгэмлэгийн өмчлөлд шилжүүлэх шийдвэр Улсын Дээд шүүхээс гаргасан байна.
“УБТЗ” ХНН-ийн Хууль зүйн албаны хуулийн зөвлөх Х.Энхсүх “Иргэн Л.Пүрэвбаатар 2014 оны арванхоёрдугаар сард төмөр замын удирдах байгууллага болох Ерөнхий хорооны хурлаар төмөр замын даргаар томилогдсон. Томилогдсон тухайн өдрөө ажил олгогч буюу Ерөнхий хороотой контракт гэрээ байгуулалгүйгээр Төрийн өмчийн хорооны даргын үүргийг түр орлон гүйцэтгэгч Д.Цогтбаатартай контрактын гэрээг хууль бусаар байгуулсан байгаа юм.
Тухайн үед Д.Цогтбаатар гэдэг хүн түр орлон гүйцэтгэгч буюу УБТЗ-ыг төлөөлөх эрхгүй этгээд байсан. Тийм этгээдтэй хийсэн контракт гэрээгээ үндэслэн УБТЗ-ын хөрөнгөөр өөртөө 1.5 үнэтэй хаус авах шийдвэр гаргасан байдаг.
Ингээд 2016 оны есдүгээр сар хүртэл ажиллаж, түүнтэй байгуулсан контракт гэрээг дүгнэх хурлаар Л.Пүрэвбаатар гэрээнд заасан үүрэгт ажлаа хангалтгүй биелүүлсэн байна хэмээн үзэж хугацаанаас өмнө контракт гэрээг цуцалж, ажлаас нь халсан.
Ажлаас халсан тохиолдолд ажил олгогч албаны орон сууцаар хангаж байсан бол орон сууцаа буцаан авах эрхтэй байдаг. Энэ эрхийнхээ дагуу тухайн орон сууцыг өөрийн өмчлөлд авах хүсэлтээ удаа дараа илэрхийлсээр ирсэн. Гэтэл Л.Пүрэвбаатар орон сууцыг чөлөөлж өгөхгүй байсан учир 2018 оны нэгдүгээр сард орон сууцыг албадан чөлөөлүүлэх нэхэмжлэлийг гаргасан. Тухайн хэргийг хэлэлцэх явцад Л.Пүрэвбаатар сөрөг нэхэмжлэл буюу тухайн орон сууцыг өөрийнх нь өмчлөлд шилжүүлэх тухай нэхэмжлэл гаргасан.
Анхан шатны шүүхийн шийдвэр Л.Пүрэвбаатарын талд гарсан хэдий ч 2018 оны дөрөвдүгээр сарын 11-ний өдөр Нийслэлийн давж заалдах шатны шүүхээс “УБТЗ” ХНН нь хуульд заасны дагуу бусдын хууль бус эзэмшлээс өөрийн хөрөнгөө шаардах эрхтэй” гээд Л.Пүрэвбаатар нь уг хаусыг эзэмших, ашиглах эрхгүй тул нэн даруй суллаж Улаанбаатар Төмөр Замд буцааж өгүүлэхээр нэхэмжлэлийг хангаж шийдвэрлэсэн юм.
Энэхүү шийдвэрийг эсэргүүцэж Л.Пүрэвбаатар нь Улсын дээд шүүхэд гомдол гаргасныг Улсын дээд шүүх шүүн хэлэлцэж Нийслэлийн давж заалдах шатны шүүхийн шийдвэрийг хэвээр баталж, Л.Пүрэвбаатарын гомдлыг хэрэгсэхгүй болгосон юм.
Ингээд үл хөдлөх эд хөрөнгийг хууль ёсны өмчлөгчид буюу Улаанбаатар төмөр замд шүүхийн шийдвэрийн дагуу хүлээлгэн өгөх, үүнийг албадан гүйцэтгэх тухай Дээд шүүхийн тогтоол гараад, Хан-Уул дүүргийн анхан шатны шүүхийн шүүгчийн захирамжаар албадан гүйцэтгэх ажиллагаа хийгдэж байхад иргэн Л.Пүрэвбаатар Баянгол дүүргийн иргэний хэргийн анхан шатны шүүхэд хандаж, тус шүүхийн шүүгч энэ чиглэлээр үйл ажиллагаа явуулахгүй байхыг даалгасан захирамж гаргасан. Энэ нь Иргэний хэрэг шүүхэд хянан шийдвэрлэх тухай хуулийн 11 дүгээр зүйлийн 11.1-д “Шүүхийн хүчин төгөлдөр шийдвэрийг иргэн, хуулийн этгээд заавал биелүүлнэ” гэсэн заалт зөрчигдөж шүүхийн шийдвэр гүйцэтгэх байгууллага Дээд шүүхийн тогтоолыг биелүүлэх үү эсхүл анхан шатны шатны шүүхийн шүүгчийн захирамжаар үйл ажиллагаагаа зогсоох уу гэсэн эрх зүйн маргааны эх үндэс болж хууль ёс гажуудахад хүргэлээ.
Тиймээс энэ асуудлыг эцэслэн шийдвэрлэхээр өнөөдөр Монгол Улсын Ерөнхийлөгч Х.Баттулга, ҮАБЗ-д хандаж байна” хэмээн тайлбарлалаа.
Энэхүү мэдэгдлийн үеэр “УБТЗ” ХНН-ийн дарга асан Л.Пүрэвбаатар гаднаас орж ирсэн юм. Тэрээр дээд шатны шүүхийн шийдвэрийг биелүүлэхгүй байгаа болон иргэний хэргийн шүүхэд ямар үндэслэлээр хандсан талаар тайлбар өглөө.
“УБТЗ” ХНН-ийн дарга асан Л.Пүрэвбаатар “Намайг сайн ажиллавал энэ орон сууцаа өөрийн өмчлөлд үлдээхийг зөвшөөрсөн ТУЗ-ийн даргын шийдвэр надад байгаа. УБТЗ төрийн өмчит байгууллага учраас Төрийн өмчийн хорооны даргын үүргийг түр орлон гүйцэтгэгч Д.Цогтбаатартай хийсэн контракт гэрээ байгуулсан. Тус гэрээг прокурор шалгаад үнэн зөв байна гэсэн акт гаргасан.
Шүүхийн шийдвэр “Та энэ орон сууцыг өгчих. Харин УБТЗ танд үр дүнгийн шагналд байр авч өгөх ёстой юм байна. Энэ нь нотлох баримтад үндэслэгдсэн” гэж гарсан. Би тэр байрыг аваад одоогийн байраа чөлөөлж өгөх гээд хүлээгээд байж байна.
Тиймээс би Дээд шүүхийн шийдвэрийг үндэслээд Баянгол болон Хан-Уул дүүргийн Иргэний хэргийн шүүхэд өгсөн чинь шүүхийн шийдвэр гүйцэтгэх ажиллагааг зогсоосон. Шүүх бол яг номоороо ажиллаж байна. Би контракт гэрээнийхээ үүргийг биелүүлээд байраа аваад өгчих л гэж хандсан.
Байрыг бол би чөлөөлөөд өгчихье. Харин энэ байрыг зараад төмөр замчдын урьдчилгаа төлбөрт өгнө гэж худал хуурмаг мэдээлэл хийж, төмөр замчин залуучуудыг хууран мэхэлж байгаа” гэж мэдэгдлээ.
