Улаанбаатар хотод өглөө 08.00 цагт гамшгийн дуут дохио дуугарснаар болзошгүй аюул тохиолдсон үед өөрийгөө болон бусдыг хэрхэн хамгаалах талаарх үзүүлэх сургуулилт эхэллээ.
Дуут дохио дуугарахад 111 аюулгүйн талбайд 420.0 иргэн өөрийн гэртээ хамгийн ойр орших талбайд цугларч бүртгүүлсэн. Тэдэнд онцгой байдал болон бусад албаны хүмүүс аюул гамшгийн үед хэрхэн биеэ хамгаалах талаарх заавар зөвлөгөөг өгсөн юм. Тухайлбал, газар хөдлөлт мэдрэгдэж эхэлмэгц өөрийн аюулгүй байдлаа ханган сууна, харин газар хөдлөлт дахин мэдрэгдэхээс өмнө гэрээс гарах үедээ гүйхгүй, бусдыг түлхэхгүй, буцахгүйгээр гадагш гарч, аюулгүйн талбайд цугларах ёстой хэмээн зөвлөлөө.
Энэхүү цугларалтад орон сууцны иргэд ихээхэн идэвхтэй оролцлоо. Тэд гэр бүлээрээ түр цуглах талбайдаа ирж бүртгүүлцгээж байгаа нь сургуулилтад ихээхэн ач холбогдол өгч байгаа нь харагдаж байсан юм.
Харин гэр хорооллын иргэд идэвх маш муутай харагдлаа. Тэднээс дохио дуугарсны дараа айл бүрээс нэг л хүн ирж бүртгүүлж байсан юм. Гэхдээ тэдний ихэнх нь хөгшчүүл байгаа нь харамсалтай. Хэрэв үнэхээр газар хөдлөлт болвол хэдэн залуучууд нь хүүхдүүдтэйгээ залхуураад гэртээ үлдэх юм байна гэх сэтгэгдэл төрүүллээ.
Ингээд төлөвлөгөөний дагуу гамшгаас хамгаалах сургуулилалт дууссанаар нийслэлийн тээврийн хэрэгслийн хөдөлгөөний хязгаарлалтыг цуцлан 09.30 цагт замын хөдөлгөөнийг хэвийн горимд шилжүүлсэн юм.
