Монголын телевизүүдийн ашиг орлого яг ТЭД гээд гаргачихсан тоо баримт даанч алга.Татвартай холбоотой асуудал учраас нарийн мэдээллээ ил гаргахыг хүсдэггүй байж мэднэ. Гэхдээ төр нь телевизүүддээ мөнгө хувааж өгдөг гэхээр тарчигхан байдалтай, амь зуудаг гэх ойлголтыг өгч байгаа биз. /Олон уран бүтээлчид ажилладаг, техник, тоног төхөөрөмж нь өндөр өртөгтэй гээд телевизийн дотоод амьдралыг мэдэхгүй хүний нүдээр шүү дээ./ Гэвч тийм биш бололтой.
Тухайлбал, бидэнд мэдэгдэж байгаагаар ТВ-8 телевиз гурав хоногийн эфирээ хаалгуулсан гэж MNBC телевизээс 95.0 сая төгрөг нэхэмжилжээ.
Чухам хоёр байгууллагын гэрээнд юу гэж тусгасан байгааг мэдэхгүй юм. Ямартай ч ТВ-8 бол цөм хийдэг телевиз юм байна гэх ойлголтыг авлаа. Зөвхөн MNBC-гээр тэдний эфир цацагдаагүйгээс болж учирсан хохирол нь энэ шүү дээ. Эндээс багахан тоо бодвол ТВ-8 телевиз өдөртөө 31.6 сая төгрөгийн ашигтай ажилладаг бөгөөд амралтгүй ажилладаг гэж үзвэл сардаа нэг тэрбум орчим төгрөгийн орлого олохоор байна. Үүн дээрээ төрөөс бас дэмжлэг авчихна. Тэгээд л тэрбумнуудын эгнээнд таахалзаж явдаг байх нь. Ийм орлоготой телевизийн эзэн төрийн байгууллагын үйл ажиллагаанд “нөлөөлж чадна аа, чадна”. Мөн өөрийгөө алх, бусдыг хадаас мэтээр бодох нь ойлгомжтой юм.
Гэвч МСНЭ-ийн Ерөнхийлөгч Х.Мандахбаяр ийм өндөр ашигтай телевизийг, ранк дээгүүр өдөр тутмын сонины хамтаар гурван тэрбум төгрөг багтаан худалдан авсан гэх мэдээлэл байна. Авсан ч гэж дээ одоогоор төлбөрөө гүйцэт өгөөгүй асуудал бий. Улмаар энэ төлбөрөө олох гээд сэтгүүлчдийг дагуулан Өмнөговиор уул уурхайн компани шантаажилж яваа ч байж магадгүй.
Өөрөө MNBC-д 110 сая төгрөгийн түрээсээ төлөөгүй асуудалтай. Тэгсэн мөртлөө шинэ авсан телевизийнхээ нэг өдрийн хохирлыг 30 гаруй сая төгрөгөөр үнэлдэг МСНЭ-ийн Ерөнхийлөгч Х.Мандахбаяр таны үйлдэл бүрээс алдаа дутагдал харагдаад байх юм. Тэрбумтанд энэ бол жижиг асуудал байх л даа…
