Сангийн сайд Ч.Хүрэлбаатар өөрийн фэйсбүүк пэйж хуудсаар дамжуулан гаргасан мэдэгдэлдээ “Дарханы Төмөрлөгийн Үйлдвэр”-ийг 2017-2018 онд нийт 12 удаагийн гүйлгээгээр 84,040,360,682 төгрөгийн УРЬДЧИЛГАА авсан болохыг мэдэгдсэн билээ.
Үүнтэй холбогдуулан “Дарханы төмөрлөгийн үйлдвэр”-ээс хариу мэдэгдэл гаргасан байна. Уг мэдэгдэлд: “Дарханы Төмөрлөгийн үйлдвэр” нь Сангийн сайдын дурдсанаар бол “Эрдэнэт үйлдвэр”-ээс ямар нэгэн урьдчилгаа төлбөр аваагүй болохоо албан ёсоор мэдэгдэж байна.
Урьдчилгаа төлбөр болон нийлүүлсэн бараа бүтээгдэхүүний төлбөр хоёр нь огт өөр зүйл юм. Бид “Эрдэнэт үйлдвэр”-тэй 20 гаруй жил хамтарч ажиллаж ирсэн бөгөөд тус үйлдвэрийн ган бөөрөнцөг цувих цехийн үндсэн түүхий эд болох кругийг зах зээлийн үнээр нь нийлүүлэн төлбөрөө авч байсан болно. Мөн гэрээний дагуу нийлүүлж байсан бүтээгдэхүүнээ “Эрдэнэт үйлдвэр”-ийн цувих цехд эвдрэл гэмтэл гарсаны улмаас нийлүүлэлтээ түр зогсоох хүсэлт ирсний дагуу зогсоосон байгаагаа албан ёсоор мэдэгдэж байна” гэсэн юм.
Харин тэдний энэхүү мэдэгдэлтэй холбогдуулан Сангийн сайд Ч.Хүрэлбаатар өөрийн фэйсбүүк пэйж хуудсаараа дамжуулан “Засгийн газрын тогтоолоор байгуулагдсан Сангийн яам, Монголбанк, ТӨБЗГ, ТЕГ-ын төлөөлөл бүхий ажлын хэсгийн “Эрдэнэт үйлдвэр” ТӨҮГ-ын 2016-2019 оны үйл ажиллагаанд хийгдсэн санхүүгийн хяналт, шалгалтын дүнтэй холбогдуулан “Дархан Төмөрлөгийн Үйлдвэр” ХК, “Цемент шохойн үйлдвэр” ХК-иуд мэдэгдэл гаргажээ. Мэдэгдэлд “2016-2019 онд өөрийн бүтээгдэхүүний үнэд 103.6 тэрбум төгрөгийн урьдчилгаа аваагүй болно” гээд намайг УУЧЛАЛ ГУЙ гэжээ.
Гэтэл шалгалтын явцад “Эрдэнэт үйлдвэр” ТӨҮГ нь “Дархан төмөрлөгийн үйлдвэр” ХК-тай 2017-2018 онд нийт 12 удаагийн гүйлгээгээр 84,040,360,682 төгрөг, “Хөтөлийн цемент шохой” ХК-тай 2017-2019 онд нийт 14 удаагийн гүйлгээгээр 19,537,867,923 төгрөгийн УРЬДЧИЛГАА олгосон нь гүйлгээ тус бүрт хавсаргасан албан бичиг, төлбөрийн баримтаар нотлогдож байна. Эдгээрийн нийлбэр дүн нь 103.6 тэрбум төгрөг болж байна. Холбогдох материалуудыг та бүгдэд хүргэж байна. УУЧЛАЛ ГУЙХГҮЙ ЭЭ” гэх хариу мэдэгдэл гаргажээ.
