Шинээр сонгогдсон УИХ-ын гишүүд 30 хоногийн дотор ХОМ-ээ бүртгүүлэх үүрэгтэй

 

Улсын Их Хурлын болон аймаг, нийслэлийн иргэдийн Төлөөлөгчдийн Хурлын 2016 оны сонгуулийн үр дүнгээр тухайн шатны сонгуульд сонгогдсон Улсын Их Хурлын гишүүд болон аймаг, нийслэлийн иргэдийн Төлөөлөгчдийн Хурлын Төлөөлөгчид нь Авлигын эсрэг хуулийн 10 дугаар зүйлийн 10.3, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 23 дугаар зүйлийн 23.3-т заасныг үндэслэн тухайн албан тушаалд сонгогдсон буюу томилогдсон өдрөөс хойш 30 хоногийн дотор 2015 оны хувийн ашиг сонирхлын мэдүүлэг болон хөрөнгө, орлогын мэдүүлгээ холбогдох байгууллагуудад гаргаж бүртгүүлнэ.

Монгол Улсын Ерөнхийлөгчийн 2016 оны 7 дугаар сарын 1-ний өдрийн 85 дугаар зарлигаар Улсын Их Хурлын долоо дахь удаагийн сонгуулийн Анхдугаар чуулганыг 2016 оны 7 дугаар сарын 5-ны өдөр товлон зарлагдсан бөгөөд Үндсэн хуулийн 23 дугаар зүйлийн 23.2, Монгол Улсын Их Хурлын тухай хуулийн 6 дугаар зүйлийн 6.4-т заасны дагуу Улсын Их Хурлын гишүүний түр үнэмлэхээ гардаж авсан нэр дэвшигчид тангараг өргөснөөр Улсын Их Хурлын гишүүний бүрэн эрх нь хэрэгжиж эхлэх тул тухайн өдрөөс хойш 30 хоногийн дотор Авлигатай тэмцэх газарт мэдүүлгээ бүртгүүлэх үүрэгтэй.

Авлигатай тэмцэх газраас Улсын Их Хурлын гишүүдийн 2015 оны хувийн ашиг сонирхлын мэдүүлэг болон хөрөнгө, орлогын мэдүүлгийг тус газарт ирүүлэх талаар зохион байгуулалтын арга хэмжээг авч, хамтран ажиллах асуудлаар Улсын Их Хурлын Тамгын газрын ерөнхий нарийн бичгийн дарга Б.Болдбаатарт албан бичгийг хүргүүлснээс гадна мэдүүлэг гаргагчдад зориулсан гарын авлага, зөвлөмжийг хүргүүллээ.