Л.Мөнхтүшиг: Монголын консулын ажилтнууд хар тамхины хэрэгт холбогдсон нь үнэн

Бид ХБНГУ-ын Дрезден хотын шалган нэвтрүүлэх постоор 5 дугаар сарын 3-ны өдөр Монголын дипломат ажилтнууд 70 кг геройны төрлийн мансууруулах бодис тээвэрлэж байгаад баригдсан талаар мэдээлж байсан билээ. Тэгвэл энэ талаар ГХЯ-ны Консулын газрын дарга Л.Мөнхтүшиг мэдээлэл өгч, сэтгүүлчдийн асуултад хариуллаа.
ГХЯ-ны Консулын газрын дарга Л.Мөнхтүшиг “Энэхүү хэрэгтэй холбогдуулан шалгагдаж байгаа хоёр хүн нь Истанбул дахь Монголын Ерөнхий консулын газарт ажилладаг хүмүүс гэдэг нь үнэн. Тэдний нэг нь дипломат ажилтан, нөгөө нь жолооч хүн байсан. Гэхдээ уг хэргийг хянан шалгах ажиллагаа явагдаж, эцэслэгдээгүй байгаа тул эдгээр хүний нэрийг одоогоор олон нийтэд мэдээлэх боломжгүй” гэлээ.
-Хэрэг гарснаас хойш сар гарны хугацаа өнгөрч байж мэдэгдлээ. Яагаад ГХЯ энэ асуудлыг нууцлах болов?
– Энэ асуудлыг ГХЯ нуусан хэрэг огт байхгүй. Хилийн чанадад байгаа иргэдийн хэргийн талаарх мэдээллийг бид гадаадад байгаа 43 орны консулын газраар дамжуулан авдаг. Ингээд авсан даруй ар гэрийнхэнд нь мэдэгдэх зэрэг бүхий л арга хэмжээг авдаг.
Хэргийн талаарх мэдээллийг ГХЯ авсан даруй олон нийтэд мэдээлдэггүй. Шалтгаан нь нэгдүгээрт, ар гэрийнхэн болон хувь хүний хүсэлтийн дагуу нууцыг хадгалах болдог. Хоёрдугаарт энэ хэрэг нь одоогоор шалгагдаад явж байгаа, эцэслэгдэн шийдэгдээгүй учир мэдэгдээгүй.
– Хэрэгт холбогдсон хүмүүс бол энгийн иргэн биш, дипломат ажилтан шүү дээ. Энэ тал дээр ГХЯ ямар нэгэн арга хэмжээ авсан уу?
– Тухайн хэрэгт холбогдсон хоёр ажилтан нь консулын газарт ажилладаг, эрх бүхий
албан тушаалтнууд гэдэг нь үнэн. Гэхдээ суугаа улсын хуулийг зөрчсөн асуудал бол консулын асуудал болдог хуультай. Тэгэхээр консулын чиглэлээр бид холбогдох ажлууд хийгдэж байгаа. Ямар нэгэн байдлаар хэргийг санаатай болон санаандгүй нуун дарагдуулсан асуудал байхгүй.
-Шалгагдаж буй хүн Дрезден хотноо ямар ажлаар явж байсан бэ?
Одоо яг энэ асуудлыг бид шалгаж байна. Зөвхөн консулын ажилтнаас гадна энэ хэрэгт холбоотой монгол улсын иргэд байгаа эсэхийг ТЕГ-аас шалгаж байна. Үүнтэй холбогдуулан өөр мэдээлэл өгөх боломжгүй.
Мөн энэ үеэр яг ийм хар тамхитай холбоотой, ийм ноцтой хэмжээний хэрэг гарч байгаагүй хэмээн мэдэгдлээ.