Өнөөдөр дэлхий нийтийн анхаарал Япон улсын Осака хотноо төвлөрч байна. Учир нь өнөөдөр /2019.06.28/ дэлхийд эдийн засгаараа тэргүүлэгч 20 улсын удирдагч нар энэ хотноо чуулах гэж байгаа юм. Эдгээр 20 улс дэлхийн дотоодын нийт бүтээгдэхүүний 85 хувийг, нийт худалдааны эргэлтийн 75 хувийг бүрдүүлж байдаг бөгөөд нийт хүн амын 2/3 нь эдгээр улсуудад амьдардаг аж. “Их 20”-ийн бүрэлдэхүүнд Австрали, Америк, Аргентин, Бразил, Герман, Индонез, Итали, Их Британи, Канад, Мексик, Орос, Өмнөд Солонгос, ӨАБНУ, Саудын Араб, Турк, Франц, Хятад, Энэтхэг, Япон болон Европын Холбоо багтдаг юм.
Энэ удаагийн уулзалт Япон улсад зохион байгуулагдаж байгаатай холбогдуулан Японы Ерөнхий сайд Шинзо Абэ хуралдааныг даргалан явуулна. Тэрээр АНУ-ын Ерөнхийлөгч Д.Трамптай уулзаж энэ yдаагийн уулзалтыг амжилттай зохион байгуулж, дэлхий нийтэд тулгамдсан асуудлуудыг шийдвэрлэхэд хамтран ажиллахыг хүсчээ. Харин түүний хүсэлтийн хариуд Д.Трамп, би худалдааны асуудал болон батлан хамгаалахын тоног төхөөрөмжийн худалдаанд гол анхаарлаа хандуулна хэмээн хэлсэн байна.
Дэлхий дахин АНУ-ын Ерөнхийлөгч Дональд Трамп, БНХАУ-ын дарга Ши Жиньпин нарын шийдвэрт ихээхэн анхаарал хандуулж байна. Хоёр улсын хооронд нэг жил орчим үргэлжилж буй “худалдааны дайн”-ыг энэ удаагийн уулзалтаар нэг тийш болгох байх гэсэн хүлээлт дэлхий нийтэд байгаа юм. Учир нь Хятадын эдийн засгийн өсөлт удааширч байгаа бөгөөд Дональд Трамп ирэх 2020 онд Ерөнхийлөгчийн сонгуультай. Тиймээс энэ удаагийн уулзалтаар “худалдааны дайн” дуусах магадлал өндөр гэж үзэж байгаа юм.
Мөн энэхүү уулзалтаар яригдах нэг гол асуудал бол АНУ- Ойрхи Дорнодын нөхцөл байдал. Ойрхи Дорнодын бүс нутагт хурцадмал байдал өсөн нэмэгдэж байгаа бөгөөд Ормузын хоолойн ойролцоо хоёр нефть тээвэрлэгч хөлөг онгоц халдлагад өртсөн нь байдлыг улам даамжруулсан хэрэг болсон юм. Мөн өнгөрсөн долоо хоногт АНУ-ын дроныг сөнөөсөнтэй холбогдуулан АНУ-аас Иранд цэргийн цохилт өгч магадгүй нөхцөл байдал үүсээд байгаа билээ.
Ийнхүү өнөөдөр Осака хотноо эхлэх “Их 20”-ийн уулзалтаар АНУ-БНХАУ хоорондын “Худалдааны дайн”, АНУ-Ираны хооронд үүсч болзошгүй зэвсгийн дайныг зогсоох шийдвэрүүд гарахыг дэлхий нийтээрээ хүлээж байна.
