Энэ сарын 11-21 өдрүүдэд Казахстан улсын Нур-Султан хотноо Парапауэрлифтингийн ДАШТ амжилттай зохион байгуулагдсан билээ. Уг тэмцээнд амжилттай оролцсон Монгол улсын баг тамирчид өнөөдөр сэтгүүлчдэд мэдээлэл өглөө.
Тэмцээнд нийт 77 улсын 2700 гаруй тамирчин оролцсон бөгөөд Монгол улсыг төлөөлж хоёр тамирчин, нэг дасгалжуулагч хүч сорьжээ. Тэмцээний -80 кг-ийн жинд 38 улсын тамирчин хүч сорьсоноос Г.Ган-Эрдэнэ 28 дугаар байранд орсон байна.
Харин -107 кг-ийн жинд хүч сорьсон Монгол улсын Гавьяат тамирчин Э.Содномпилжээ 247 кг-ийг өргөж 20 улсын 22 тамирчнаас алтан медалийн болзол хангажээ. Тэрээр энэхүү амжилтаараа өмнө нь өөрийн эзэмшдэг байсан дэлхийн дээд амжилтыг мөн шинэчилж байгаа юм.
ПНХ-ны нарийн бичиг Д.Баттулга: Казахстан улсад болсон энэхүү тэмцээн Олимпын дараа ордог томоохон тэмцээн. Энэхүү тэмцээнд манай тамирчин Э.Содномпилжээ амжилттай сайхан оролцож түрүүллээ. Тэрбээр дэлхийн рекордыг 3 кг ахиулж 247 кг болголоо. Өрсөлдөөн бол маш ширүүн байсан дандаа өндөр зэрэглэлийн нэг жингийн тамирчид өрсөлдсөн. Тийм учраас халаалтаас авахуулаад бүгд өрсөлдөөн байлаа.
МУГТ Э.Содномпилжээ: “Бэлтгэл хийж байхдаа цээжин дээрээ 260 шахдаг байсан. Тэмцээнд орж байхад энэ жин өөрчлөгдөнө. Учир нь тактикын асуудал дараа дараагийн тэмцээнд орохдоо өөрийгөө нөөж байгаа хэрэг. Би 2020 оны Токиогийн олимпийн наадамд хамаг хүчээ гаргана. Парапауэрлифтингийн спорт бол ганц хүч тамирын спорт биш. Тайзны ард л жинхэнэ өрсөлдөөн болж байдаг. Жин захиалж өргөнө гэдэг бол маш том тактикийн асуудал юм” гэсэн юм.
МУГТ Э.Содномпилжээ: Парапауэрлифтингийн спорт бол дан ганц хүч тамирын спорт биш, тайзны ард ч өрсөлдөөн болдог
}
Шинэ мэдээ
