УИХ-ын гишүүн, Барилга, хот байгуулалтын сайд асан З.Баянсэлэнгэд авсан таслан сэргийлэх арга хэмжээг өөрчилж, Сонгинохайрхан дүүргийн шүүхээс түүнийг батлан даалтад гаргажээ.
Түүнийг Чингэлтэй дүүргийн Эрүүгийн хэргийн анхан шатны шүүхийн шүүгчийн захирамжаар өнгөрсөн аравдугаар сарын 21-нд Урьдчилан хорих 461 дүгээр ангид хугацаагүйгээр цагдан хорьсон юм.
З.Баянсэлэнгийг шүүхийн байгууллагад хүндрэл учруулсан хэмээн цагдан хорих, таслан сэргийлэх арга хэмжээ авсан юм. Мөн өнгөрсөн сарын 28-нд шүүхээс түүнийг үргэлжлүүлэн хорих шийдвэр гаргаад байсан юм.
Нийслэлийн прокурорын газраас 2002 оны Эрүүгийн хуулийн тусгай ангийн 263.2 дахь хэсэгт зааснаар албаны эрх мэдэл буюу албан тушаалын байдлаа урвуулан ашигласан хэргээр шалгаж буй. Ингэхдээ З.Баянсэлэнгэ нь Барилга, хот байгуулалтын сайдаар ажиллаж байхдаа “Бэрэн групп” ХХК-ийн барьсан “Хангай” хотхоны орон сууцнаас 123 айлын орон сууцыг тендер зарлалгүйгээр худалдан авч, улсын төсөвт 972.4 сая төгрөгийн хохирол учруулсан байж болзошгүй гэж үзэж буй юм.
Тэгвэл өнгөрөгч даваа гарагт суллагдсаныхаа дараагаар өөрийн цахим хуудаснаа “Би нь эргээд ирлээ. Санаа тавьсан нүүр номын найзууддаа баярлалаа. Би бууж өгөхгүй ээ” хэмээн бичжээ.
