Таны өмнө нэгэн банкнаас зээл авсан иргэний тооцоо харагдаж байна.
Энэхүү хашаа байшингийн зээлийг 2013 оны 05 сард авчээ. 10 жилийн хугацаатай 30 сая төгрөгийн зээлийн эргэн төлөлт, гүйцэтгэлийн хуваарийг та харж байна. Арилжааны банкинд сар бүр 600.000 орчим төгрөг төлсөнөөр 4 жилд нийт 27.5 сая төгрөг тушаажээ. Гэтэл энэхүү зээл төлөлт нь зөвхөн хүүнд 22 сая, үндсэн зээлээс 5.5 сая төгрөг хасагдсан байна. Одоо зээлээ дуусгая гэхэд 24.5 сая төгрөг төлөгдөж байж зээл хаагдана. Арай ч дээ… Энэ дэндүү биш гэж үү?
Монголчуудыг яаж амьдар, иргэдийг яаж хуримтлалтай бол, үр хүүхдээ яаж хүний дайтай авч яв гээд байгаа юм бэ?
Ипотекийн зээлтэй 100.000 иргэний амьдрал ч “эзэн боолын систем”-д шилжсэн. 8%-ийн зээл үнэхээр бодит тооцоолол мөн эсэхэд эргэлзэж байна. 8%-ийн зээлийг 6% руу буулгах, цаашид гэр хорооллын иргэдэд амины орон сууц олгоход ч дэмжлэг үзүүлэх ёстой. Зүй бус эдийн засгийн тогтолцоог нураах эрх мэдэл 2020-2024 оны парламент, Засгийн Газарт бий.
Жирийн иргэд улстөрийн намд талцан хуваагдах бус цалин орлого нь амьдралд хүрэлцдэг нийгмийг л хүсч мөрөөдөж байна. Хэрвээ мөнгөний мөлжлөг үргэлжилсээр байвал баян ядуугийн ялгаа улам холдоно. Эцэстээ ядарч, цөхөрсөн иргэд 1 хүний дарангуйлал, баячуудын өмчийг нийгэмчлэхийг л хүсэх болно. Гадны банкийг ч нээлттэй урьж, оруулах хэрэгтэй.
Хувийн хэвшлийг дэмжинэ… Гэхдээ шударга байх ёстой…
