БНСУ-ын 26 дахь ерөнхийлөгч Yoon Seok Yeol нь өөрийн Засгийн газар, танхимын сайдуудаа бүрдүүлж байна.
Тэрээр Шадар сайд бөгөөд Боловсролын сайдад Сөүлийн үндэсний их сургуулийн профессор Park Soon Аe-г нэр дэвшүүлэв. Гэвч түүнийг энэ албан тушаалыг хаших ёс зүйн эрхгүй гэх мэдээлэл цацагдлаа. Профессор Park Soon Аe нь 2001 онд согтуугаар тээврийн хэрэгсэл жолоодож баригдахдаа эрхээ хасуулах хэмжээний согтуу байжээ.
Нэр дэвшигч Park Soon Аe нь 2001 оны 12 сарын 17-ны 23 цагийн орчимд Сөүлийн Жун-гу хотын замд согтууруулах ундаа хэрэглэсэн үедээ тээврийн хэрэгсэл жолоодож явжээ. Энэ мэдээллийг БНСУ-ын сөрөг хүчин, хэвлэлүүд илчлэн шударга ёс, ёс зүй шаардаж байна. Тухайн үед профессор бүсгүйн цусан дахь спиртийн агууламж 0.251 хувь байсан нь тухайн үеийн жолооны эрх хүчингүй болгох стандартаас 2.5 дахин их байсан гэнэ. Одоо мөрдөж буй Замын хөдөлгөөний тухай хуульд зааснаар цусан дахь спиртийн агууламж 0.2% ба түүнээс дээш байвал 2-5 жил хүртэл хугацаагаар хорих, 10-20 сая воноор торгох шийтгэл оногдуулдаг байна.
Нэр дэвшигчийг хамгийн их буруутгаж буй зүйл нь тухайн үед ямар нэгэн хариуцлага хүлээгээгүй явдал болжээ. Прокуророос түүний үйлдсэн хэрэгт дараа оны 2-р сарын 18-нд яллах дүгнэлт үйлдэн торгууль ноогдуулсан. Гэвч Park Soon Аe нь хүлээн зөвшөөрөлгүй шүүхэд давж заалджээ. Улмаар мөн оны есдүгээр сарын 12-нд Сөүл хотын төв дүүргийн шүүхээс 2.5 сая воны торгуулийн ялыг түдгэлзүүлжээ.
Согтуугаар тээврийн хэрэгсэл жолоодож осолдох үед нэр дэвшигч Park Soon Аe нь Сүнсил их сургуулийн төрийн удирдлагын тэнхимийн туслах профессор байсан. Хэрэг гарсны дараа тус сургууль Park Soon Аe-д сахилгын шийтгэл ногдуулсан эсэх нь тодорхойгүй байна.
Нэр дэвшигч Park Soon Аe нь “согтуугаар тээврийн хэрэгсэл жолоодсон хэргээр тэнсэн харгалзах ял авсан” гэдгээ хүлээн зөвшөөрсөн ч хэргийн нарийн ширийн зүйл болон шалтгааныг тодруулаагүй байна. Тэрээр:
“Энэ бол миний өршөөж боломгүй алдаа байсан, 20 жилийн дараа ч энэ талаар гүнээ эргэцүүлэн бодож байна”, “Би чин сэтгэлээсээ гэмшиж байна”, “Ард түмнийг түгшээж байгаад уучлалт гуйж байна.”
гэжээ. Харин сөрөг хүчин болон хэвлэлүүд “тухайн үеийн нөхцөл байдлыг харгалзан Park Soon Аe-д шүүхээс зөөлөн хандсан ч энэ нь ёс суртахууны хувьд өөгшүүлж болохгүй” гэдгийг онцолжээ.
Эх сурвалж: korea.postsen.com
