Сэтгүүлч Т.Шинэбаяр нь олон нийтийн сүлжээнд Шадар сайд С.Амарсайханы удам судрыг гутаан, доромжилсон агуулгатай пост оруулсан бөгөөд энэ асуудалтай холбоотой эрүүгийн хэргийн шүүх хурал өнөөдөр Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхэд боллоо.
Т.Шинэбаярыг прокуророос Эрүүгийн хуулийн тусгай ангийн 13, 14 дүгээр зүйлийн 1 дэх хэсэгт зааснаар буюу Худал мэдээлэл тараасан /1.Хүний нэр төр, алдар хүнд, хуулийн этгээдийн ажил хэргийн нэр хүндэд халдсан илт худал мэдээллийг олон нийтэд тараасан бол дөрвөн зуун тавин нэгжээс нэг мянга гурван зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас гурван сар хүртэл хугацаагаар зорчих эрхийг хязгаарлах ял шийтгэнэ/ гэж үзэн яллах дүгнэлт үйлдэн шүүхэд шилжүүлсэн юм.
Тэгвэл Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүх прокурорын дүгнэлтийг үндэслэлтэй буюу Т.Шинэбаяр нь “илтэд худал мэдээллийг олон нийтэд тараасан” гэж үзэн торгох ял ноогдуулсан байна.
Өмнө нь шүүх яллагдагч Т.Шинэбарыг “…эрүүгийн хэрэг хянан шийдвэрлэх ажиллагаанд саад учруулахгүй байх зорилгоор…” 2023 оны 01 дүгээр сарын 26-ны өдрөөс эхлэн Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээ авч шийдвэрлэж байв.
Сэтггүүлч Т.Шинэбаяр нь өөрийн цахим хуудаснаа дараах постыг байршуулснаар ийнхүү торгуулийн ял шийтггүүлээд байгаа юм.
