Хүний эрхийн үндэсний комисс /ХЭҮК/-оос хурдан морины хаврын уралдаантай холбоотой цаг үеийн асуудлаар мэдээлж байна.
ХЭҮК-ын дарга Д.Сүнжид Засгийн газраас гарсан шийдвэртэй холбогдуулан комиссын байр суурийг илэрхийллээ. Тэрбээр, Засгийн газар 2019 онд гаргасан өвөл, хаврын морин уралдааныг хориглох тухай тогтоол нь уралдаанч хүүхдийн амь нас, эрүүл мэнд, хөгжих, сурч боловсрох эрхийг хамгаалах, хүүхдийг аюултай хөдөлмөр эрхлүүлэхгүй байх түүнийг таслан зогсоох, энэ нөхцөлөөс урьдчилан сэргийлэх томоохон ахиц дэвшил байсан.
Харин энэ тогтоолоо хүчингүй болгосноор хүүхэд нэгдүгээрт байх, хүүхдийн ашиг сонирхолыг дээдлэх зарчмаасаа ухралт хийж байна. ХЭҮК энэ шийдвэрт харамсаж байна. Иймд гаргасан шийдвэрээ эргэн харж, хүүхдэд ээлтэй шийдвэр гаргаасай гэж хүсэж байна гэв.
Мөн Хурдан морины уралдаан нь ЮНЕСКО-гийн хүн төрөлхтний соёлын биет бус өвийн жагсаалтад багтсан Монгол Улсын төрт ёсны түүхэн уламжлал, өв соёл мөн боловч өвөл, хаврын уралдаан нь түүхэн уламжлал биш гэдгийг онцоллоо.
Хурдан морины хаврын уралдаан нь зарим газарт хаврыг угтаж, урт уяа сойлго хийж, хол зайд морь уралдуулах заншлын хүрээнд үүссэн байна.
