Нийтийн тээврийн бодлогын газарт иргэдээс ирсэн талархлыг хүлээн авч, санал, гомдол хүлээн авдаг билээ. Тус газарт сүүлийн дөрвөн өдөр иргэдээс ирсэн санал, хүсэлт, гомдлыг хэрхэн шийдвэрлэснийг хүргэж байна.
“БУУДЛААС ЗОРЧИГЧОО АВАХГҮЙ ЯВЧИХЛАА”
Иргэний гомдол: Сонгинохайрхан дүүргийн иргэн У: Ч:38 чиглэлийн 5-271 гарааш дугаартай автобус 22:31 цагт Цамбагараваас хүнээ аваагүй явсан тул арга хэмжээ авч өгнө үү.
Шийдвэрлэлт: “Сутайн буянт” ХХК-ийн 5-271 гарааш дугаартай автобусны жолооч О.А-г шалгаж, гаргасан зөрчилд нь Зөрчлийн тухай хуулийн 14.6 дугаар зүйлийн 9 дэх хэсэгт заасныг үндэслэн 25 нэгжтэй тэнцэх хэмжээний төгрөгөөр торгох шийтгэл оногдууллаа.
“БИ ЯАЖ МЭДДЭГ ЮМ БЭ, НЯМБААТАРААСАА АСУУ”
Иргэний гомдол: Баянзүрх дүүргийн иргэн Н.М: Зорчигч тээвэр-4 ОНӨААТҮГ-ын 15-093 гарааш дугаартай автобусны жолооч Ч:24Б “Нисэх-ТЭЦ:4-3,4-р-Гандан” чиглэлд ажиллахдаа дамжин суултын талаар асуусан чинь би яаж мэддэг юм Х.Нямбаатараасаа асуу гээд зүй бус үг хэллэгээр маш их доромжилсон. Арга хэмжээ авч өгнө үү.
Шийдвэрлэлт: Зорчигч тээвэр дөрөв ОНӨААТҮГ-ын 15-093 гарааш дугаартай тээврийн хэрэгслийн жолооч Ц.Б-ыг шалгаж, гаргасан зөрчилд нь Зөрчлийн тухай хуулийн 14.6 дугаар зүйлийн 9 дэх хэсэгт заасныг үндэслэн 25 нэгжтэй тэнцэх хэмжээний төгрөгөөр торгох шийтгэл оногдууллаа.
“АВТОБУС ЦАГ ГАРУЙ ХҮЛЭЭСНЭЭ ХЭЛТЭЛ “БАЛАЙ АВГАЙГААРАА” ДУУДУУЛЛАА”
Иргэний гомдол: Баянгол дүүргийн иргэн Б.С: 02-238 гарааш дугаартай автобусыг бүтэн цаг шахам хүлээж байж суугаад удаан хүлээсэн тухайгаа хэлтэл “битгий элийрээд бай балай авгай минь” гэж загнасан. Шалгаж арга хэмжээ авч хариу мэдэгдэнэ үү гомдолтой байна.
Шийдвэрлэлт: Иргэний гомдлын дагуу Зорчигч тээвэр хоёр ОНӨААТҮГ-ын 2-238 гарааш дугаартай тээврийн хэрэгслийн жолооч З.Д-ыг шалгаж, гаргасан зөрчилд нь Зөрчлийн тухай хуулийн 14.6 дугаар зүйлийн 9 дэх хэсэгт заасныг үндэслэн 25 нэгжтэй тэнцэх хэмжээний төгрөгөөр торгох шийтгэл оногдууллаа.
“ЭГНЭЭ РҮҮ ОРОХ ГЭЭД БАГТАХГҮЙ БАЙХАД ЗҮЙ БУС ҮГЭЭР ДОРОМЖИЛЛОО”
Иргэний гомдол: Баянгол дүүргийн иргэн С.Б: Зорчигч тээвэр-5 ОНӨААТҮГ-ын 25-080 гарааш дугаартай автобусны жолооч Ч:24А “Зүрх уул-3,4 р хороолол” чиглэлд ажиллахдаа Дүүхээ дэлгүүрийн урд замд 1-р эгнээгээр орж ирэхдээ багтахгүй байсан чинь автомашины зогсоолд зогсож байсан намайг зүй бус үг хэллэгээр дайрч доромжиллоо. Арга хэмжээ авч хариу өгнө үү. Жич: 2-р эгнээнд улаан автобус цагаан шугам руу шахаж зогссон байсан тул 25-080 1-р эгнээнд багтахгүй байсан.
Шийдвэрлэлт: Иргэний гомдлын дагуу нийтийн зорчигч тээврийн үйлчилгээний Зорчигч тээвэр тав ОНӨААТҮГ-ын жолооч Б.Б-ыг шалгаж, гаргасан зөрчилд нь Зөрчлийн тухай хуулийн 14.6 дугаар зүйлийн 9 дэх хэсэгт заасныг үндэслэн 25 нэгжтэй тэнцэх хэмжээний төгрөгөөр торгох шийтгэл оногдууллаа.
“ЖОЛООЧ БЭЛЭН МӨНГӨ АВААД БАЙНА”
Иргэний гомдол: Иргэн С.Т: Х:15 “Жаргалант тосгон-Хар хорин” чиглэлд явж байгаа 3-228 гарааш дугаартай автобусны жолооч бэлэн мөнгө аваад байна арга хэмжээ авч хариу өгнө үү. (Шаардлага тавихад хэл амаар доромжилсон байнга ингэж бэлэн мөнгө авч байна)
Шийдвэрлэлт: Иргэний гомдлын дагуу нийтийн зорчигч тээврийн үйлчилгээний Зорчигч тээвэр гурав ОНӨААТҮГ-ын жолооч Ч.М-ыг шалгаж, гаргасан зөрчилд нь Зөрчлийн тухай хуулийн 14.6 дугаар зүйлийн 9 дэх хэсэгт заасныг үндэслэн 25 нэгжтэй тэнцэх хэмжээний төгрөгөөр торгох шийтгэл оногдууллаа.
Нийтийн тээврийг илүү хүртээмжтэй, илүү сайжруулахын төлөө иргэн таны санал хүсэлт, мэдээлэл маш чухал. Та бүхэн үнэн бодит мэдээлэл өгч, бидэнтэй хамтран ажиллаарай хэмээн Нийтийн тээврийн бодлогын газраас мэдээллээ.
