Холбооны шүүхийн шүүгч Сумати Муругиа 4.7 сая ринггитийг Ш.Алтантуяа агсны гэр бүлийн өмгөөлөгчийн дансанд байршуулахыг Малайзын Засгийн газарт үүрэг болгов.
Захиалгат аллагын хохирогч болсон Монгол Улсын иргэн Шаарийбуугийн Алтантуяагийн гэр бүлд учирсан хохирлыг Малайзын Засгийн газар хэрэв давж заалдах хүсэлт нь амжилтгүй болбол нэн яаралтай төлж барагдуулах ёстой гэсэн дүгнэлтийг тус улсын шүүхээс гаргажээ.
2006 онд Ш.Алтантуяагийн амийг хөнөөсөн хэрэгт тус улсын Засгийн газар, Абдул Разак Багинда болон тусгай албаны хоёр цагдаад хариуцлага хүлээлгэх ёстой гэсэн шүүхийн дүгнэлт 2022 онд гарч байсан юм. Түүнээс хойш хэрэгт холбогдсон талууд хохирлыг төлж барагдуулаагүй гэсэн үндэслэлээр хохирогчийн гэр бүл дахин шүүхэд хандсан аж. 2022 оны шийдвэрт Малайзын Засгийн газар болон Абдул Разак Багинда давж заалдах гомдол гаргаад буй.
Гэрчийн мэдүүлэгт дурдсанаар Ш.Алтантуяа нь Абдул Разактай харилцаатай байсан бөгөөд 2002 онд Малайз улсын Засгийн газар Францын Төрийн өмчит компаниас шумбагч хөлөг худалдан авах хэлэлцээнд орчуулагчаар ажилласан байдаг.
Тухайн үед Нажиб Разак Батлан хамгаалахын сайд байсан бол Абдул Разак наймаанд зуучлагчаар оролцсон байна. Тэрхүү наймаа авлигын шинжтэй байсан эсэхийг тогтоох Малайз, Францын хамтарсан мөрдөн шалгах ажиллагаа өдгөө үргэлжилж байгаа аж.
2006 оны аравдугаар сард Ш.Алтантуяаг Куала Лумпурын ойролцоох ойд буудан хөнөөж, цогцсыг нь устгахын тулд тэсрэх бөмбөг ашигласныг цагдаа нар тогтоож байв. Аллагыг үйлдсэн цагдаагийн алба хаагч Азила Хадри, Сирул Азхар нарт Малайзын шүүхээс цаазын ял оноосон.
2019 онд Азила Хадри мэдүүлэг өгөхдөө аллагын захиалагч нь Ерөнхий сайд Нажиб Разак байсныг мэдэгдэж байв.
Харин Сирул Азхар нь Австрали руу зугтсан бөгөөд Австрали улсын Засгийн газар түүнийг Малайз руу буцаавал цаазлуулах магадлалтай гэж үзэн шилжүүлж өгөхөөс татгалзжээ.
