Хятадыг Монголчуудаас илүү сайн мэдэх үндэстэн дэлхий дээр өөр нэг ч байхгүй гэдэг нь үнэний хувьтай. Яагаад гэвэл Монголчуудын өвөг дээдэс болон Монголчууд хятадтай 3000 жилийн турш дайтаж, найрамдаж харилцахдаа “хятадууд” хэн болохыг хэнээс ч илүү мэдсэн аж.
Харин Европ, Америк Монголчуудаас олон зуун жилийн дараа, саяхан шахам хятадтай харилцаж эхэлсэн учраас “хятад хүн” ямар санаатай болохыг мэдэхгүй байсаар одоо л “Хятадын аюул”, “Хятадын экспанс”-ын талаар дуугарч байна.
Гэвч тэд хожимдсон байж магад.
Яагаад гэвэл Америк, Европ өөрсдөө Хятадыг хэтэрхий дэмжиж, хамаг юмаа зааж өгч, асар их хөрөнгөө оруулж хүчирхэгжүүлсэн учраас одоо тогтоон барьж, дийлэхэд хэцүү болсон гэлцэж байна.
Жишээ нь, Америк, Европын их дээд сургууль, аж үйлдвэрийн салбарт дуулгавартай, хичээнгүй ажиллаж байсан 30.000 хятад эрдэмтэн, инженерүүд барууны хамгийн нарийн технологийг сурч эзэмшээд хэдийнээ эх орондоо буцаж, хүчээ өгч байгаа гэх мэдээлэл бий. Тэд үнэндээ алсын зорилготой туршуулууд л байсан бөгөөд хоёр, гурван үеийн дараа ч эх орондоо үнэнч хэвээр байжээ. АНУ-ын цэрэг, аж үйлдвэрийн салбараас Хятадын тагнуулыг илрүүлсэн тухай мэдээлэл үе үе дуулдах боловч цаана нь хэдэн мянган хятад эх орончид тухайн улсын аж үйлдвэр, судалгааны байгууллага, төрийн алба, яамдад ажиллаж байгааг нарийн мэдэх аргагүй болжээ.
Харин Монголчууд хятадуудыг мэддэг тулдаа хятадаар дүүрсэн Зүүн Өмнөд Ази шиг болчихолгүй тэсэж байна.
1970-аад онд Монголын нэрт зохиолч Д.Маам “Газар шороо” романдаа Манж үндэстнийг уусгаад буй Хятадын мэргэд Манжийн дараа Монголыг, дараа нь Орос, Европыг, дараа нь бүх дэлхийг эрхшээх стратегиа хэлэлцэж буйг бичжээ. Энэ стратегийг хятадууд өөрсдөө “ямхын бодлого” гэх ба зөвхөн Монгол зохиолч хятадын энэ ямхын стратегийн талаар дэлхийд анх удаа ингэж бичсэн байдаг аж…
“Ямхаас бүрддэггүй урт гэж байдаггүй, өргөн ч гэж байдаггүй. Монголын газар нутаг ямхаас бүрэлдэнэ, дэлхий ч ямхаас бүрэлдэнэ. Хязгааргүй төө явж, сөөм ухарсаар Хятад хүн чи нэгэн жарны дараа Үхэр Монголыг, хоёр жарны дараа Оросыг, 10-н жарны дараа бүх дэлхийг Хятад болгоно”…
Өвгөдийнхөө ухааныг тээсэн зохиолч Д.Маам дэлхийд ноёлох Хятадын ямхын стратегийг ямар мундаг харж бичсэнийг энэ зохиолыг уншсан нэг залуу бүр гайхаж хэлж байна лээ. Ер нь дэлхий дээр хятад хүний тухай бичсэн хамгийн сайн ном нь Монгол зохиолчийн “Газар шороо” роман л байх.
Социализмын үед манай зохиолчид мундаг бичдэг байжээ.
Хятадууд социализмын 70 жилд Монгол дээр л жаахан саатсан болохоос Америк, Австрали, Европ, Африкт бүр яагаад ч дийлдэхгүй болж байгааг бид харж байна. Гэвч Монгол залуус барууны нөлөөнд хэт автсанаас болж хаяанд байгаа энэ аюулыг тоохгүй Хятадын хөгжлөөр бахархаж, “Хятадын хөгжлийн галт тэргэнд суумаар байна” гэх хандлагатай болж байх шиг.
Монгол хүн бүр урд зүгт ямар үндэстэнтэй зэрэгцэн оршиж байгаагаа битгий мартаасай!
(Энэхүү нийтлэлийн эх сурвалжийг олсонгүй…)
