Ажил хаялт зарлаад буй багш нар Боловсролын яамтай хэлэлцээр хийж, тохиролцсон. Энэхүү хэлэлцээрээ Гэр бүл, хөдөлмөр, нийгмийн хамгааллын яам /ГБХНХЯ/-нд бүртгүүлснээр ажил хаялтыг албан ёсоор зогсооно хэмээн мэдэгдсэн.
Энэ талаар Гэр бүл, хөдөлмөр, нийгмийн хамгааллын сайд Т.Аубакираас тодрууллаа.
Тэрбээр “Боловсролын яам болон багш нарын үйлдвэрчний эвлэл урьдчилсан хэлэлцээрт хүрсэн. Энэхүү хамтын хэлэлцээрийг ГБХНХЯ-нд бүртгүүлж байж хүчин төгөлдөр болсон гэж үздэг.
Одоо УИХ дахь МАН-ын бүлэг хуралдаж байна. Төсвийн байнгын хороо, Сангийн яамныхан оролцоод төсвийн бололцоо ямар байгааг ний нуугүй ярилцаж байна.
Манай яам багш нарын нэмэх шийдвэрийг дангаараа гаргах боломжгүй. Тиймээс бүлэг дээр ямар зардлаас хасаж байж цалин нэмэг боломжтой вэ гэдгээ авч хэлэлцэж байна. Гэхдээ энэ шийдэгдсэн зүйл биш.
Багш нарын зүгээс 2026 онд хоёр үе шаттайгаар буюу 2.8 сая төгрөг хүргэх хүсэлт тавьж байгаа. Тооцооллын хувьд 76 хувиар цалингаа нэмүүлэх хүсэлт багш нар тавьсан. Энэ хүсэлтийг биелүүлэх боломж байгаа эсэхийг одоо хэлэлцэж байна.
Засгийн газрын зүгээс энэ хэлэлцээр болж байна, бүртгэ гэсэн тохиолдолд би бүртгэнэ.
Төсвийн байнгын хорооноос гурван хувилбар танилцуулсан. Ингэхдээ төсвийн ерөнхийлөн захирагч нарын төсвөөс 15-20 хувийг хасах, үргэлжилж байгаа төсвийн хөрөнгө оруулалт, төсөл хөтөлбөрүүдээс 15-20 хувийг хасах зэргээр ярилцаж байна.
Хэлэлцээрт 2027 онд багш нарын цалинг 3.5 саяд хүргэнэ гэдэг зүйлийг оруулсан байна. Хэрэв энэ хэлэлцээрийг батлах юм бол Засгийн газар ийм үүрэг хүлээнэ гэсэн үг. 2027 оны улсын төсвийг одоо ярих боломжгүй. Хэлэлцээрийн хүрээнд дүн, хувь тавихгүйгээр нэмэгдүүлнэ гэхгүй бол үүрэг хүлээх болчихоод байна.
Багш, эмч нарын цалин, тэтгэврийн нэмэгдлийг ярилцаж байна. Тэтгэврийг 8.6 хувиар нэмэх бол эмч нарын цалинг 15-20 хувиар нэмэхээр ярилцаж байна. Эцсийн шийд гараагүй” гэлээ.
