МАН-ын бага хурал Ц.Нямдорж, М.Энхболд хоёрын нэгийг сонгоно

 

 

Өнөөдөр буюу 5-р сарын 3-ны өдөр МАН-ын VIII-р бага хурал тусгаар тогтнолын ордонд эхэллээ. Өчигдөр орой хуралдсан удирдах зөвлөлийн хурлаас бага хуралд хэлэлцэх асуудлуудыг бэлдэж оруулсан байна. 

Хоцорч эхэлдэг Монгол зан

МАН-ын бага хурал өнөөдөр өглөө 11 цагт нээлтээ хийнэ хэмээн зарлагдсан. Хурал эхлэхээс арван минутын өмнө буюу 10:50-д МАН-ын ерөнхий нарийн бичгийн дарга Д.Амарбаясгалан сэтгүүлчдэд мэдээлэл өгнө хэмээж байлаа. Гэвч хоцордог Монгол зангаараа МАН-ын бага хурлын гишүүд уваж цуван хоцорч ирсээр, Д.Амарбаясгалан товлосон цагаасаа 40 минут хоцорч сэтгүүлчдэд үг хэлсэн бол МАН-ынбага хурал бүтэн цагаар хоцорч нээлтээ хийсэн юм. 

Бага хурлаар хэлэлцэх асуудал

Энэ удаагийн VIII-р бага хурлаар МАН-аас 2017 оны ерөнхийлөгчид нэр дэвшигчийг тодруулах, нэр дэвшигчийн мөрийн хөтөлбөрийг батлах гэсэн хоёр үндсэн асуудал хэлэлцэнэ. 

МАН-ын генсекийн мэдэгдэл

МАН-ын ерөнхий нарийн бичгийн дарга Д.Амарбаясгалан сэтгүүлчдэд мэдээлэл өгөх үеэрээ. Энэ удаагийн бага хурал маш өндөр төвшинд бэлтгэгдэж, дотоод ардчилал сайтай явагдаж байгааг онцолсон юм. Тэрээр мөн \”Та бүхэн мэдэж байгаа МАН 2016 оны сонгуульд маш сайн судалгаа хийж оролцсон. Энэ удаа ч гэсэн ерөнхийлөгчид нэр дэвших хүмүүсийн судалгаа хийсэн. Судалгаагаар У.Хүрэлсүх, Ц.Нямдорж, М.Энхболд, Ө.Энхтүвшин, Б.Бат-Эрдэнэ гэсэн таван хүний нэр тодорсон. Ингээд МАН-ын удирдах зөвлөл тэр таван хүнээ хүлээж авч уулзсан. У.Хүрэлсүх, Ө.Энхтүвшин, Б.Бат-Эрдэнэ нaр намаа дэмжиж ажиллая хэмээн нэрээ татсан. Намын дарга, УИХ-ын дарга М.Энхболд, УИХ-ындэд дарга Ц.Нямдорж хоёрыг удирдах зөвлөлөөс ерөнхийлөгчид нэр дэвшүүлэхээр бага хуралд оруулж байна” хэмээн хэллээ. Хэдийгээр МАН-ын удирдах зөвлөлөөс энэ хоёр хүнийг ерөнхийлөгчид нэр дэвшүүлэх эрхийн санал хураалгахаар бага хуралд оруулж байгаа боловч бага хурлын гишүүд танхимаас хүн дэвшүүлэх боломжтой юм байна. 

Үнэмшилгүй мэдэгдэл

МАН өнгөрсөн сонгуульд 60 тэрбум төгрөгийн асуудалд орооцолдсон. Түүнээс өмнө Н.Номтойбаяр тэрбум төгрөгөөр дэд сайд болсон гэх хэл ам гарч байлаа.МАН-ын генсек Д.Амарбаясгалан ерөнхийлөгчийн сонгуульд нэр дэвших хүнд тавьсан ямар нэгэн босго мөнгө, хандив огт байхгүй тухай мэдэгдсэн юм. Хэдийгээр түүний үг сайхан утгатай ч үнэмшилгүй сонсогдож байсан юм. 

Бага хурлын нээлт 

Товлосон хугацаанаасаа бараг цаг шахуу хоцорч эхэлсэн МАН-ын бага хурлыг нээжМАН-ындарга М.Энхболд үг хэлж, бага хурлын гишүүдэд баяр хүргэснээр эхэллээ. Ингээд хурал даргалагчаар УИХ-ынгишүүн Ч.Хүрэлбаатар, Архангай аймгийн засаг даргын орлогч Б.Болормаа бага хурлын дэд дарга гэх хоёр хүнээр хуралдаанаа даргалуулахаар сонгосон юм. Хурал нээгдээд удаагүй байхад хамгаалалтын ажилтнууд сэтгүүлчдийг гаргасан бөгөөд МАН-ын бага хурал цаашдаа хаалттай үргэлжлэхээр боллоо. 

Төрийн ордон тусгаар тогтнолын ордон тийш нүүсэн нь

2016 оны улсын их хурлын сонгуулиар үнэмлэхүй ялалт байгуулсан МАН-ын бага хурал төрийн ордон нүүгээд ирэв үү гэлтэй харагдана. Бага хурлын гишүүдийн 70 орчим хувь нь буюу 200 гаруй гишүүдийн нэлээд хувь нь МАН-аас сонгогдсон УИХ-ын гишүүд байлаа. УИХ-ын дэд дарга, ерөнхийлөгчид санаархагч Ц.Нямдоржоос хуралдаандаа суудаггүй гэх зэмлэл сонсдог гишүүд хүртэл бага хуралдаа идэвхийлэн ирсэн нь хууль тогтоох дээд байгууллагын хурлаас илүүтэй намын бага хурал хүчтэй байгааг, төр засгаас илүүтэй нам хүчтэй байгааг харуулж байх шиг санагдсан. 

Сэтгүүлчдийн таамаглал

Бага хурал хаалттай хуралдахаар сэтгүүлчдийг гаргах үед зарим нэг нь авсан идсэн, муу сайнаа чөлөөтэй дуудалцах гэж сэтгүүлчдийг гаргалаа гэж дүгнэсэн. Түүнээс гадна цаг үеийн үйл явдалд гүйсээр гайгүй дүгнэлт гаргачихдаг болсноос гадна МАН-ын хэдэн дарга нарын ааш занг нэвт мэддэг сэтгүүлчид бага хурлаас Ц.Нямдорж гарч ирэхгүй. М.Энхболд ногоон гэрлээр ерөнхийлөгчид дэвшинэ хэмээн таамаглаж байлаа. МАН-ын араншинг дэндүү сайн мэдэх сэтгүүлчдийн тодорхойлолт бодит байдлаас бараг л зөрөхгүй болов уу.

 

С.Амаржаргал