“Алтай констракшн” ХХК-ны захиалгаар “Тольт дэнлүү” ХХК-ийн туслан гүйцэтгэгчээр ажиллаж буй Баянзүрх дүүргийн 26 дугаар хороонд “Саруул” хотхоны B7 блок барилга дээр өргөгч цамхагт кран унаж, олон машинд эвдрэл гэмтэл учруулсан талаар бид өмнө нь мэдээлсэн билээ.
Осол гарлаа гэх мэдээллийн дагуу түргэн тусламж, цагдаагийн байгууллага, онцгой байдлын албаныхан болон НМХГ-ын барилгын техникийн хяналтын болон хөдөлмөрийн аюулгүй байдлын улсын байцаагчид ослын газар дээр ажиллаж хяналт шалгалт явуулжээ.
Шалгалтаар 12 цутгамал төмөр бетон карказан хийцтэй барилгын урд угсарсан улсын бүртгэлийн 1760 дугаартай QTZ-40 маркийн 4 тонн даацтай цамхагт кран нь дээрээсээ 5-6 секцийн хооронд бэхэлгээ тасарч унахдаа сумны үзүүр хэсэг нь зэргэлдээ орших “Баянмонгол” хорооллын 410 дугаар байрны дээврийн хэсэг, пронтоны өрөг, нийтийн зам талбай дээр зогсож байсан 4 автомашин, зэргэлдээ орших уг барилгын хашаа болон тор хашааг гэмтээсэн нь тогтоогджээ.
Мөн дээврийн хар цаасан үе бетон тэгшилгээний үе, дулаалгын үе, пронтоны өргийг цөмлөн гэмтээсэн, айлын цонхны шил хагарсан байдалтай байгаа аж.
Кран ойролцоогоор 42 м-ээс унах үед бүхээгт байсан 1 кранчин эмнэлэгт хүргэгдсэн бөгөөд уг кранист “Алтай констраш”-ны барилга дээр туслан гүйцэтгэгчээр ажиллаж буй “Тольт дэнлүү” компаны ажилтан БНАСАУ-ын иргэн 36 настай эрэгтэй байсан байна. Одоогоор гэмтсэн хүний гэмтлийн зэрэг тогтоогдоогүй байгаа ба мэргэжлийн кранист мөн эсэхийг тодруулахаар шалгаж байгаа юм байна.
Осол гарах үед “Баянмонгол хороолол”-ын 410 дугаар байрны 9,10 давхарын хийцлэлд нөлөөлсөн, дүүргэгч өрлөгүүд, үндсэн хийцэд нөлөөлсөн байх магадлалтай тул нарийвчилсан шинжилгээ хийж эхэлжээ. Нарийвчилсан үзлэгийн дүгнэлт гарсаны дараа мэргэжлийн хяналтын байгууллагаас хүчдэл бэхэлгээ хийх мэт дараагийн шатны арга хэмжээг авч ажиллах юм байна.
