Нийслэлийн Мэргэжлийн Хяналтын Ерөнхий Газрын Эрүүл Мэнд, Боловсрол Соёлын Хяналтын хэлтсийн Эмчилгээний чанарын хяналтын улсын ахлах байцаагч Б.Байгалмаатай цаг үеийн асуудлаар ярилцлаа.
Нийслэлийн хэмжээнд үйл ажиллагаа явуулж байгаа улсын болон хувийн хэвшлийн эмнэлэгүүдэд хийж буй хяналт шалгалтын талаар ярина уу?
Ер нь бол мэргэжлийн хяналтын байгуулагаас эрсдэлд суурилсан хяналт шалгалтуудыг хийдэг. Тэгэхээр эрсдэлд суурилна гэдэг маань эрсдлийн шалгуур үзүүлэлтийг үнэлсний үр дүнд тухайн жилдээ их буюу дунд эрсдэлтэй эсэхийг нь сонгож шалгадаг гэсэн үг юм. Энэ оны байдлаар нийслэлийн мэргэжлийн хяналтын газраас эрсдэлд суурилсан хяналт шалгалтыг их буюу дунд эрсдэлтэй гэж үнэлэгдсэн эмнэлэгүүдийг шалгуур үзүүлэлтээр нь үнэлэж шалгахаар болсон. Үүнд 148 эмнэлэг хамрагдхаар зарлагдсан байгаа. Тэгэхээр эмнэлэгийн тусламж үйлчилгээний чанар аюулгүй байдлын талаар нь авч үзвэл энэ тусламж үйлчилгээ нь чанар, хүртээмж, аюулгүй байдлаараа иргэд олон түмэнд хэр хүрч байгаа эсэх мөн эрүүл ахуй халдвар хамгаалалт болон эм био бэлдмэлийн хангалт, хадгалалт хамгаалалт нь ямар байгаа вэ гэдэг хяналт шалгалтуудыг хийдэг юм. Одоогийн байдлаар нийслэлийн хэмжээнд үйл ажиллагаа явуулж байгаа улсын болон хувийн хэвшлийн эмнэлэгүүдэд чиглэл бүрээр төлөвлөгөөт хяналт шалгалтуудыг хийгээд явж байна.
Өнгөрсөн жилд хийсэн хяналт шалгалтынхаа талаар ярьж өгнө үү?
Нийслэлийн хэмжээнд нийтдээ улсын болон хувийн хэвшлийн 1000 гаруй эмнэлэг байдаг. Өнгөрсөн 2017 оны байдлаар нийслэлийн хэмжээнд төлөвлөгөөт хяналт шалгалтад 130 эмнэлэг хамрагдсан. Эдгээр 130 эмнэлэгийн нийтлэг зөрчил дутагдал нь ихэнх эмнэлэгүүдэд хүний нөөцийн асуудал ихээхэн дутагдалтай байгаа зөрчил дутагдал илэрсэн. НМХГ-аас эдгээр эмнэлэгүүдийн бүтэц үйл ажиллагааны стандарт болон эмч мэргэжилтнүүдийн ур чадвар, тусламж үйлчилгээний баримтлан ажиллах стандарт буюу эмнэл зүйн удирдамжийн хэрэгжилт хэр байгаа зэрэгт хяналт тавьж ажиллаа. Хоёрдугаарт хяналт шалгалтад хамрагдсан эмнэлэгүүдийн эмч мэргэжилтнүүдийг сургах чадавхжуулах байдал болон эмнэлэгийн стандарт удирдамжийн хэрэгжилтэд хяналт тавьдаг дотоод хяналтын үйл ажиллагаа хангалтгүй, тэдний баримтлан ажиллаж байгаа стандарт удирдамжийн хэрэгжилтийн дотоод хяналт маш сул хоорондоо уялдаа холбоогүй байгаа нь шалгалтын үеэр илэрсэн. Үүний үндсэн дээр бид эдгээр эмнэлэгүүдэд хугацаатай үүрэг даалгавар өгч зөрчил дутагдалыг арилгуулах, мөн зөрчил гаргасан эмнэлэгүүдийн албан тушаалтанд захиргааны арга хэмжээ авч ажиллаа.
Хувийн хэвшлийн эмнэлгүүд маш их зөрчил дутагдалтай байдаг гэж иргэдийн зүгээс шүүмжилдэг. Ялангуяа шүдний эмнэлэгүүд зориулалтын бус газар үйл ажиллагаа явуулж байна гэж ярьдаг. Энэ талаар та тодруулж ярина уу?
Нийслэлийн хэмжээнд үйл ажиллагаа явуулж буй гадаадын хөрөнгө оруулалттай хувийн хэвшлийн эмнэлэгүүд тодорхой хэмжээгээр байдаг. Эдээр нь ихэвчлэн Хятад, Солонгосын хөрөнгө оруулалтай эмнэлэгүүд юм. Эдгээр эмнэлэгүүдэд үйл ажиллагаа явуулах тусгай зөвшөөрлийг ЭМЯ-аас олгодог. Энэ жилийн тухайд нийт нийслэлийн хэмжээнд үйл ажиллагаа явуулж байгаа шүдний эмнэлэгүүдэд шинжилгээтэй хяналт шалгалтууд хийгдээд явж байна. Мөн нэг сараас гурван сарын хугацаатай янз бүрийн курс дамжаа төгссөн хүмүүс энд тэндхийн төвүүдэд зөвшөөрөлгүйгээр бариа засал хийх, зүү тавих, ардын уламжлалын эмчилгээ хийх зэрэг зөрчил дутагдлууд их байна. Үүн дээр бид мөн урьдчилан сэргийлэх төлөвлөгөөт хяналт шалгалтуудыг хийж байгаа.
Ийм зөрчил гаргасан байгууллага, аж ахуйн нэгж үүдэд ямар торгууль ноогдуулдаг вэ?
Ийм зөрчил дутагдал гаргасан хувийн эмнэлэгүүд дээр зөрчлийн хууль, зөрчил хянан шийдвэрлэх тухай хууль мөн эрүүл мэндийн тухай хуулийн дагуу арга хэмжээ авч торгууль шийтгэл ноогдуулдаг. Ер нь бол мэргэшсэн эмч аливаа хүнд эрүүл мэндийн үйлчилгээ үзүүлж чадаагүй тохиолдолд зөрчлийн хуулиар нөхөн төлбөр тооцон, захиргааны арга хэмжээ авч, эмчлэх эрхийг нь нэг жилийн хугацаагаар хасах хүртэл арга хэмжээ авдаг хуультай байдаг.
Эмнэлэгийн түргэн тусламжийн тал дээр зөрчил дутагдал хэр их байгаа вэ? Заримдаа дуудлага өгсөн хүн дээрээ ирж дөнгөж харчихаад бага зэрэг зөвлөгөө өгсөн болоод хаяад явчихдаг гэсэн гомдол их гардаг. Үүнийг яах ёстой вэ?
Нийслэлийн хэмжээнд түргэн тусламжийн үйлчилгээ үзүүлдэг хэд хэдэн төвүүд ажиллаж байгаа. Бага зэрэг зөвлөгөө өгсөн болоод хаяад явчихдаг гэсэн гомдлын тухайд гэвэл одоогоор манайд яг тийм гомдол ирээгүй байна. Гэхдээ шаардлага нь бол мэдээж тухайн эмч яаралтай түргэн тусламжийн дуудлага өгсөн хүн бүрээ заавал үзэж оношийг нь тогтоон, шаардлагатай бол заавал эмнэлэгт хэвтүүлэх ёстой. Түүнээс биш тэдэн дуудлагатай байна, яарч явна, амжихгүй гэсэн үгийг манай эмч нар хэзээ ч хэлэхгүй. Ер нь бол түргэн тусламжийн үйлчилгээ үзүүлж байгаа нийслэлийн яаралтай түргэн тусламжийн төвийн багаж тоног төхөөрмжийн чанар хүртээмж, болон энэ төв дээр ажиллаж байгаа эмч мэрэгжилтнүүдийн хүний нөөц, хүрэлцээ, хангамж хангалттай гэж үзэж байгаа.
Цаг зав гарган ярилцсанд баярлалаа.
Ж.Батдорж
