Ч.Сайханбилэг аврагдлаа, одоо \”улсаа бодож\” нэгдэж ажиллацгаая, гишүүд ээ

-Шийдлийн Засгийн газарт бүрэн эрхийнхээ хугацааг дуусгах боломжийг УИХ-ын
гишүүд олголоо-

 

Төрийн байгуулалтын байнгын
хороо хуралдаж Монгол Улсын Ерөнхий сайд Ч.Сайханбилэгийг огцруулах
шаардлагагүй гэж үзсэн. Ингээд л өчигдөртөө асуудал \”дараа хэлэлцэгдэхээр”
дуусах байлаа. Гэвч УИХ-ын дарга З.Энхболд нэгдсэн хуралдааныг зарлаж, \”Ерөнхий
сайдыг огцруулах эсэх асуудлыг цаг алдалгүй шийдвэрлэх” санал гаргасан бөгөөд
олонх түүнийг дэмжиж, ажлын цагаа сунгаж хуралдахаар болсон юм.

 

Энэ парламентыг ингэж ирцээ
бүрдүүлж байсныг тун цөөн удаа харлаа. Н.Алтанхуягийг огцруулахад 76-лаа
хуралдаж байсан бол Ч.Сайханбилэгийн асуудлыг хэлэлцэхдээ мөн л 75-лаа буюу 98
хувийн ирцтэйгээр хуралдав. Ирээгүй нэг гишүүн нь Х.Баттулга. Ер нь хичээл
таслалтаарай ангийнхнаа хошуучилдаг эрхэм гишүүн Ерөнхий сайдыг огцруулах эсэх
асуудал \”надад хамаагүй” гээд тоосонгүй.

 

Ингээд гишүүн бүр дөрвөн
минутын санал, асуулга, зөвлөмж, хамгаалалт гэж ярьсаар шөнийн 01 цагийн үед Ч.Сайханбилэгийг
огцруулах шаардлагагүй гэж олонхоор шийдвэрлэлээ. Өөрөөр хэлбэл Шийдлийн Засгийн
газарт бүрэн эрхийнхээ хугацааг дуусгах боломжийг УИХ-ын гишүүд олголоо.

 

МАН-ынхан огцруулах нь зүйтэй гэдэг дээр харин
АН Ерөнхий сайдаа авч үлдэх нь зүйтэй гэдэг дээр санал өгцгөөв. Санал хураалтад
73 гишүүн оролцож, 42/31 харьцаагаар Ч.Сайханбилэг энэ удаад аврагдлаа.

 

 

Энэ парламентэд суусан цагаасаа
намдаа гомдож, Н.Алтанхуягийг огцруулахад ихээхэн нөлөөлөлтэй оролцож байсан
Р.Амаржаргал энэ удаад харин намынхаа байр суурийг хамгаалж, Ч.Сайханбилэгийг
огцруулахгүй байхыг дэмжиж саналаа өглөө. Ер нь АН-ынхан эвтэй, нэгдмэл байж
чадлаа гэж ойлгогдож байгаа юм. Тэдэн дээр Шударга ёс эвслийн бүлгийн зарим
гишүүд, ИЗНН-ын хоёр гишүүн нэмэгдэж санал өгсөөр Шийдлийн Засгийн газрын
тэргүүн аврагдаж чадсан юм.

Сөрөг хүчний хувьд ч хангалттай
нэгдмэл байж, мөн дээр нь бие даагч С.Ганбаатар, Ц.Даваасүрэн, Шударга ёс
эвслийн бүлгийн Л.Цог, Г.Уянга, О.Баасанхүү нар нэмэгдсэн ч олонхийн саналыг
авч чадсангүй.

 

Ерөнхий сайдыг огцруулах эсэх
асуудлыг хэлэлцэж байх үеэр Шударга ёс эвслийн бүлгийн дэд дарга З.Баянсэлэнгэ \”Бүлгийн
эсрэг саналтай байгаа гишүүдтэй ойлголцсон. Намын бодлогыг баримтална хэмээн
тохиролцсон. Дарамталсан зүйл байхгүй” гэж мэдэгдсэн. Гэтэл яг энэ мэдэгдлийн
араас УИХ-ын дэд дарга Л.Цог \”Бид өөрийн байр суурийг хамгаалах болно. Нам энд
огт хамаагүй. Биднийг сонгуульд дэвшүүлэхгүй гэж дарамталсан. Гэсэн ч гарын
үсэг зурж баталгаажуулсан байр сууриа хамгаална” хэмээн хариу мэдэгдэл хийсэн
юм.

Эндээс \”Шударга ёс” эвслийн
бүлэг өчигдрийн хуралдаанд хамгийн эв нэгдэлгүй нь байлаа гэж харагдав. Д.Тэрбишдагва, Ч.Улаан нар санал хураалтад орохгүйгээ мэдэгдэж, картаа сугалан гарч одсон бол. Г.Уянга
гишүүн тогтоолын төсөл өргөн барьснаараа, Л.Цог, О.Баасанхүү нар тэргүүн
эгнээнд тогтоолын төсөлд гарын үсэг зурснаараа ямар дарамт шахалтыг үл хайхран
намын эсрэг санал өгсөн хэдий ч амжилт олсонгүй. Магадгүй энэ шийдвэрийг
гаргаснаараа тэд ирэх сонгуулиар нэр дэвших боломжгүй болж ч байж мэдэх юм.
Гэхдээ намаасаа гарч, өөр намд элсээд нэр дэвших боломж бий.

 

За ямартай ч Шийдлийн нэртэй Засгийн
газар үлдсэн таван сардаа санаа зовохооргүй ажиллаж болох боломжтой боллоо.
Монгол Улсын Ерөнхийлөгч Ц.Элбэгдорж ч \”Ерөнхий сайдыг огцруулахыг эсэргүүцэж,
төрөө тогтвортой байлгах” тухай асуудлыг үг хэлэв.

Өчигдөр чуулганы үеэр ихэнх
гишүүд нэг л асуудлыг ярьж, нэгдмэл байр суурьтай байгаагаа илэрхийлэв. Энэ бол
Монгол Улсын эдийн засгийн хямрал. Үүнээс гарахын тулд намууд нэгдмэл байр
суурьтай байж хамтарч ажиллах нь зүйтэй. Ийм саналыг бүгд л хэлж байлаа. Тэгвэл
Ерөнхий сайдаа огцруулсангүй. Чадсангүй. Одоо нэгдмэл байдлаа хадгалж, улс
орноо бодож ажиллахыг эрхэм гишүүдээс хүсмээр байна.

 

А.Аюуш