Монгол орны өнөөгийн нөхцөл байдлыг бодитоор харах шаардлага бий болоод удаж байна. Нэг талаас бид ардчиллын замаар 25 жил явлаа. Мэдээж энэ хугацаанд ололт амжилт их байсныг үгүйсгэхгүй. Мэдээж аливаа улс орны нийгмийн замнал гэдэг өөрийн бартаатай, хир тоостой байдаг. Тэр тусмаа энэ дунд аливаа ард түмэн өөрийгөө үргэлж хянаж, цэвэрлэж явахгүй бол огт болохгүй. Өнөөгийн манай улсын эдийн засгийн тухайд яривал сүүлийн 7-8 жил 2008 оноос хойш явуулсан төрийн бодлого Монголын эдийн засгийг үндсэнд нь гадаадын улс орны улстөрийн барьцаанд оруулж золиос болголоо. Дээр нь нийгэмд үүссэн янз бүрийн шударга бус явдал, эрх мэдэлтнүүдийн дураар авирлах явдлаас үүдэн Монгол улсын эдийн засаг тун хүнд байдалд оров.
Энэ утгаар нь дүгнэж хэлэхэд Монголын улс төрийн хоёр том намын аль нь ч үндэснийхээ эдийн засгийг аваад явах чадваргүй бөгөөд хоёулаа нийлээд ч энэ ачааг дааж чадахгүй гэдгээ батлан харууллаа. Энэ хоёр намын 2012 оны сонгуульд орсон мөрийн хөтөлбөрүүдийг авч үзвэл, Ардчилсан нам ч, Ардын нам ч ялгаагүй нефть боловсруулах үйлдвэр байгуулна, төмөрлөгийн үйлдвэртэй болно, зэсийн үйлдвэр, цахилгаан станц байгуулна гээд амлаагүй юм байхгүй гэдгийг хэн хүнгүй санаж байгаа байх. Гэтэл одоо түүнээс нэг нь ч байхгүй гэдгийг бид бүхэн харж байна.
Өнөөдөр Монголын төрд шинэ бодлого огт харагдахгүй байна. Одоо байгаа улстөрийн хүчнүүдийн аль нь ч бусдаасаа ялгарах юм алга. Бүдэг саарал харанхуй орчинд л байна. Дураараа авирлах, хууль мөрдөхгүй байх нь хэвийн үзэгдэл болж. Ингээд бодоход бид хаашаа явж байгаа нь тодорхой. Монголд хариуцлагын тогтолцоог бий болгохгүйгээр, улстөрийг эрүүлжүүлэхгүйгээр эдийн засгийг өөд нь татах ямар ч боломж байхгүй. Энэ үүднээсээ ийм арчаагүй улстөрийн хүчнүүд өнөөдөр Монголын улс төрийн тавцангаас буух цаг нь нэгэнт болжээ.
Эцэст нь хэлэхэд Монгол улс ийм замаар явбал хямралаас хэзээ ч гарахгүй. Монгол улс зөвхөн үндэснийхээ эдийн засагт түшиглэсэн, өөрсдийнхөө хэрэгцээнд зориулсан, дэлхийн зах зээл дээр боломжийн үнэ хүрэх баялаг бүтээж байж бид хямралаас гарна уу гэхээс биш гаднын хэн нэгэн баян ирж Монголыг өөд татах тухай асуудал байхгүй. Иймэрхүү үлгэр ярьж байгааг эдийн засгийн алуурчдын сүүлийн үед Монголд хэрэгжүүлж байгаа номлол гэж үзэх хэрэгтэй. Тэр үүднээсээ энэ номлолыг сөрөн зогсож, МАНАН-аас нэн яаралтай салах ёстой гэдгийг Монголын ард түмэн маш сайн ойлгох шаардлагатай байна.
