![\"\"](http://undesten.mn/uploads/posts/2016-05/1463361828_1463359810-573919429bdfa.jpg "\\"\\"")
Хуульч, өмгөөлөгч Г.Батбаяр оффшор данстай нь илэрсэн улс төрчдийг сонгуульд нэр дэвшигчээр бүртгэхгүй байхыг шаардсан хүсэлтийг Сонгуулийн ерөнхий хороонд хүргүүлжээ. 2016 оны 05 сарын 09-ний өдөр Олон улсын эрэн сурвалжлах сэтгүүлчдийн холбооноос оффшор бүсэд данстай дэлхийн нэр нөлөө бүхийн улстөрчид, бизнесмэнүүд, тамирчдын тухай мэдээллийг дэлхий дахинд зарласан. Үүнд манай улсын нэр нөлөө бүхий 49 хүний нэр багтсаны дийлэнх нь өнөөгийн УИХ-д сууж буй, мөн удахгүй болох сонгуульд нэр дэвших гэж буй хүмүүс байгаа юм.
Энэ мэдээлэл гарсан даруйд хуульч, өмгөөлөгч Г.Батбаяр эдгээр нэр дурьдагдсан этгээдийн оффшор дансанд байршуулсан мөнгөний эх үүсвэрийг шалгуулахаар Эрүүгийн цагдаагийн газрын Эдийн засгийн гэмт хэрэгтэй тэмцэх хэлтэст гаргаад байсан.
Тэгвэл энэ удаад оффшор данс эзэмшигч улстөрчдийг 2016 оны УИХ-ын сонгуульд нэр дэвшигчээр бүртгэж авахгүй байх хүсэлтийг Сонгуулийн ерөнхий хороонд хүргүүлжээ.
Шинээр батлагдсан \”Сонгуулийн тухай хууль” нь Монгол улсын Үндсэн хууль болон бусад хуульд нийцэх ёстой бөгөөд тус хуулийн 129 дүгээр зүйлд \”Нэр дэвшигчийг бүртгэхээс татгалзах үндэслэл”-үүдийг хуульчилж өгсөн байдаг. Тухайлбал Сонгуулийн тухай хуулийн 128.2-т нэр дэвшигч бүртгүүлэхдээ бүрдүүлэх баримт бичгүүдийг жагсаасан бөгөөд эдгээрт \”нэр дэвшигчийн хөрөнгө орлогын мэдүүлэг” багтсан. Мөн хуулийн 129 дүгээр зүйлийн 129.1.5-д зааснаар \”..нэр дэвшигчийг бүртгүүлэхэд шаардагдах энэ хуульд заасан баримт бичиг дутуу, эсхүл хуурамч бол нэр дэвшигчийг нэрийн жагсаалтаас хасах үндэслэл болно” гэж тусгасан. Тиймээс оффшор данстай тухайгаа нэр дэвшигч хөрөнгө орлогын мэдүүлэгтээ тусгаагүй бол дээрхи хуулийн дагуу нэр дэвшигчийг бүртгэхээс татгалзах нөхцөл бүрдэж байгаа юм. Ийнхүү сонгуулийн тухай хууль болон МУ-н бусад хууль тогтоомжуудад заасанчлан хууль бус данс эзэмшигч нэр бүхий улстөрчдийг сонгуульд оролцуулахгүй байх эрхзүйн орчин бүрдэж байгаа учир хуульч, өмгөөлөгч Г.Батбаяр энэхүү хүсэлтийг гаргах болсноо хэллээ. Түүнчлэн Монгол улсын Эрүүгийн хуулийн 2701.1-т \”Нийтийн албан тушаалтан хууль ёсны орлогоосоо гадна их хэмжээгээр эд хөрөнгө, орлого олсон нь тогтоогдсон бол…” мөн хуулийн 1661-р зүйлд \”Гэмт хэргийн улмаас олсон хөрөнгө, мөнгө, орлого гэдгийг мэдсээр байж түүнийг авсан, эзэмшсэн, ашигласан, эсхүл түүний хууль бус эх үүсвэрийг нь нуух, далдлах, гэмт хэрэг үйлдэхэд оролцсон аливаа этгээдэд… таван жилээс арван хоёр жил хүртэл хугацаагаар хорих ял шийтгэнэ….хөдөлмөрийн хөлсний доод хэмжээг гурван зуугаас таван зуу дахин нэмэгдүүлсэнтэй тэнцэх хэмжээний төгрөгөөр торгох ял шийтгэнэ” /30-100 сая төгрөг хүртэл/ гэж заасан байдаг. Энэ мэтээр хууль бус данс эзэмшдэг нь тогтоогдсон этгээдүүдэд хариуцлага тооцох хууль, эрхзүйн орчин хангалттай байгаа бөгөөд холбогдох газрууд хэрхэн ажиллахыг харах л үлдээд байгаа юм. Цаг алдалгүй нэр дэвшигчээс түдгэлзүүлэх, цаашлаад хуулийн дагуу арга хэмжээ авахгүй бол оффшор данс эзэмшигч эдгээр нөхөд сонгуульд оролцож, УИХ-ын гишүүн болчихвол \”гишүүний бүрэн эрх” нэрээр халхавч хийн 4 жил хэрэгт шалгагдахгүй болох нөхцөл үүсэх юм.
