Оны өмнөхөн Дархан аварга Х.Баянмөнх, Б.Бат-Эрдэнэ нар уулзаж Бөхийн өргөөгөө даруй нээх тал дээр тохирсон. Тэгвэл өчигдөр Монголын Үндэсний бөхийн холбооны маргалдагч хоёр тал зөвшилцөлд хүрч, санамж бичигт гарын үсэг зурцгаалаа. Одоогоор холбооны тэргүүний суудалд санаархагч талуудын маргаан шүүхийн шатанд явж байгаа билээ. Ийнхүү зөвшилцсөнөөр Бөхийн өргөөний үйл ажиллагаа хэвийн явагдаж, сар шинийн барилдаанаа хийх боломжтой болж байгаа юм. Мөн маргалдагч талууд холбооныхоо ээлжит “Их эе” хурлыг хоёрдугаар сарын 16-нд хийж үүссэн маргааныг эцэслэхээр тохирчээ.
Энэ удаагийн уулзалтанд Дархан аварга Х.Баянмөнх, Б.Бат-Эрдэнэ, Г.Өсөхбаяр, аварга Н.Батсуурь, арслан П.Бүрэнтөгс зэрэг улсын цолтой бөхчүүд болон “Гацуурт”-ын Л.Чинбат нар оролцсон байна.
Уулзалтын төгсгөлд маргалдагч талууд санамж бичиг байгуулан гарын үсэг зурцгаалаа.
Санамж бичгийн хүрээнд:
- МҮБХ-ны ээлжит “Их Эе” хурлыг 2019 оны хоёрдугаар сарын 16-нд зохион байгуулах
- “Их Эе”-д бэлтгэх ажлын хэсгийг дархан аварга Х.Баянмөнх, Б.Бат-Эрдэнэ нар ахлах
- “Бөхийн өргөө”-г хэвийн үйл ажиллагаанд оруулж, Сар шинийн баярт зориулсан барилдааныг “Бөхийн өргөө”-нд зохион байгуулах зэрэг асуудлыг төлөвлөж, санал нэгджээ.
Түүнчлэн “Монголын үндэсний бөхийн холбоо” ТББ-д олон жилийн турш үүсээд байсан хуваагдал, талцал, маргааныг эцэслэн, дараах зориултуудыг хэрэгжүүлэхээр санал нэгдэж, “Ойлголцлын санамж бичиг”-т тусгасан байна. Үүнд,
- Бөхчүүдийн олон жилийн турш үргэлжилсэн талцал, хуваагдлыг эцэс болгох
- Монгол бөхийн барилдаанд бий болоод байгаа допинг, цолны найрааны асуудлыг таслан зогсоох
- Бөхчүүдийг цалин хөлс, нийгмийн даатгал, тэтгэвэр, тэтгэмжтэй болгох, бөхчүүдийн нийгмийн асуудлыг шийдвэрлэх
- Монголын нийт бөхчүүд, бөх сонирхогчид, ард иргэдийн хандиваар боссон “Бөхийн өргөө”-ний өмчлөх эрхийг МҮБХ ТББ-ын нэр дээр бүртгүүлэх
- Бөхийн холбооны санхүүгийн үйл ажиллагаа, орлого, зарлагыг нийтэд ил тод болгох, үйл ажиллагааг улам боловсронгуй болгох
- Найраа хийж, худал барилдсан, худлаа унаж өгсөн бөхчүүдийн цолыг хасч, хариуцлагыг өндөржүүлж, ёс жудаг, сахилга батыг дээшлүүлэх,
- “Бөхийн өргөө”-г түшиглэн бөхчүүдэд зориулан Хөгжлийн төв байгуулах зэрэг асуудал багтжээ.
