Дөнгөж сая Монгол Улсын Ерөнхийлөгч асан Цахиагийн Элбэгдорж шүүх, прокурор, АТГ-ын дарга нарыг солих хуулийн төслийг УИХ-аар хэлэлцэж байгаатай холбогдуулан хэвлэлийн хурал зохион байгууллаа. Түүний хэвлэлийн хуралд хэлсэн үгсийг ишлэн хүргэж байна.
-Үндэсний аюулгүй байдлын зөвлөл аюултай зөвлөл болон хувирлаа.
-Хууль зүй, Дотоод хэргийн сайд Ц.Нямдорж талийгаач С.Зоригийн аллагыг хийсэн хүмүүсээр бахархдаг. Энэ аллагаас хэн хожих вэ? Засгийн газар хуралдаж Хууль зүйн сайдаа түдгэлзүүлэх, дараа нь УИХ-ын гишүүнээс нь түдгэлзүүлэх хэрэгтэй.
-Х.Баттулга гарч ирээд өөртэй нь хамтрахгүй байгаа Засгийн газрыг огцорууллаа. Дараа нь УИХ-ыг гартаа авлаа. Одоо хууль хүчний байгууллагыг халаасандаа оруулах гэж байна. Мөн дөрөв дэх засаглал болсон сэтгүүлчдийг ч гартаа оруулна.
-Тэд “Эрдэнэс Тавантолгой” ХК-аас өгсөн 800 тэрбум төгрөг дээр найрлаж байна. Би 20, 30 жил шударга ёсыг ярьж байгаа. Надаас өөр үүнийг ярих хүн алга байна.
-“Их тэнгэр”-т нэг ч албаны зураг байгаагүй. Арван жилийн өмнө “100 зураачийн 100 зураг” арга хэмжээг би өөрөө зохион байгуулж байсан. Монголдоо уран зургийн галлерей байгуулахыг л хүссэн юм.
-Миний хамаатнууд дотор н.Пүрэвтүвшин гэж хүн байхгүй. Миний ээжийг нас барахад 127 хамаатан ирсэн. Тэдэн дунд н.Пүрэвтүвшин гэж хүн байгаагүй.
-Ерөнхийлөгч Х.Баттулга улс төрчдийн зүрхэнд айдас суулгалаа.
-Шанхайн хамтын ажиллагааны байгууллагад элсэх нь ямар ч ашиггүй. Манай эрх баригчдад өөр түших юм олдохгүй байх шиг байна, хөөрхий. Би улс төрөөс хол байхыг хүсч байгаа. Намын гишүүнчлэлээ сэргээхгүй. Хэрэв сэргээвэл эд нар намайг муулна.
-Би Н.Алтанхуягийг утааны комиссын дарга болоосой гэж хүсдэг. Энэ утааны асуудал хэзээ нэгэн цагт дуусах л байх.
-Миний гарын үсгээр 40 биш 400 шүүгч ажилд томилогдсон. Өнөөдрийн шүүхийн системийг устгаж байснаас хууль зүйн яамыг татан буулгасан нь хавьгүй дээр. Хууль шүүхийн байгууллагын нэр хүндийг дэндүү унагаж байна.
-1998 онд гарсан хэрэг. Одоо дөрөв дэх үе нь эхэлж байна. Тэр бол Ц.Нямдоржийн үйлдэл. Ц.Нямдорж Эрдэнэтийн 49 хувь, С.Зоригийн аллага дээр сэдэв хараад олж авсан. Өөрийнх нь зан араншин нь тэр.
-С.Зоригийг алсан хүмүүсийг харсан нэг л хүн байдаг. Тэр нь Зориг өөрөө.
