“ИТГЭЛИЙН ЗЭЭЛЭЭР ТА ЮУ ХИЙХ ВЭ” гэсэн асуултыг тавихад ихэнх нь “ӨРӨӨ Л ДАРНА ДАА” гэж хариулж байна. Өөрөөр хэлбэл эрх баригчид иргэддээ итгэл хэмээх хүүтэй зээл олговол өмнөх өрөө л дарж авахыг иргэд хүсэж байна шүү дээ. Гэтэл зээлийн шаардлагад өртэй байж болохгүй, ядаж л хамтран зээлдэгчээр орсон бол таны хувьд энэ зээлийг хаалга хаалттай гэдэг анхааруулгыг өгч байна.
Эндээс эрх баригчид иргэдээ бодсон шийдвэр гаргаж чадлаа юу гэсэн бодол өөрийн эрхгүй төрж байна. Ахмадууд нь тэтгэврийн зээлтэй, оюутнууд нь сургалтын төлбөрийн зээлтэй, залуус нь цалингийн болоод орон сууцны зээлтэй энэ нийгэмд өргүй хүн олно гэдэг чинь өвсөн дотроос зүү хайхтай л адил юм.
Тэгэхээр МАН үнэхээр л иргэддээ тусалья гэж чин сэтгэлээсээ хүсч байгаа бол зээлийг зээлээр дарахыг хүсч байгаа иргэдийнхээ хүсэлтийг ажил хэрэг болгож, иргэдийнхээ өрийг нэг удаадаа дарж өгөх бүр боломжгүй бол нэг удаадаа 20 сая хүртэлх төгрөгийн өрийг нь дарах тухай санал гаргавал та бүгдийг тахин шүтэхэд ч бэлэн байна шүү.
Яах вэ, өргүй хүн байвал өнөөх зээлээ аваад, приус авч унана л биз.
Харин өртэйнүүд нь өргөдөл гаргаж байгаад 20 хүртэлх сая төгрөгийн өрөө даруулчихья л даа.
Угаасаа зээл өгсөн ч, өр дарсан ч чанарын хувьд ялгаагүй төсвийн мөнгө л үрэгдэнэ биз дээ. Эсвэл зээлийн шаардлага хангах хүн байхгүй гэдгийг анхнаасаа мэдэж байгаад албаар ийм санал гаргаж өргөн барьсан юм уу. Тийм бол ёстой уучлаарай. МАН гэдэг нам энэ газрын хөрснөөс арчигдана шүү.
Ерөнхийлөгч бидний өрийг дарна гэж амласан ч яг дардаг дээрээ тулахаар дашин шог боллоо. Яах вэ, иргэдтэйгээ уулзах өдөр ирнэ л дээ. Тэр өдөр юу гэж ярихыг нь хүлээж л байя. Харин эрх баригчид минь биднийхээ өрийг дарж гийгүүлнэ үү. Угаасаа 33 их наяд төгрөгийг өршөөчихөж чаддаг эрх мэдэл та бүхэнд бий шүү дээ. Тиймээс итгэл нэртэй зээл тарааж байхаар бидэндээ итгээд өр л дараад өгчих. Өөр ярих юм алга аа.
