Харилцаа холбооны зохицуулах хороо болон Фэйсбүүк компанийн хамтын ажиллагааны үр дүнд хууль бус контентийн талаарх гомдол хүсэлтийг түргэн шуурхай шийдвэрлэх, зохицуулалтыг хэрэгжүүлэхэд шаардлагатай “ногоон суваг” буюу шууд харилцах цахим сувгийг өнгөрөгч зургаадугаар сараас эхлэн Монгол Улсад албан ёсоор нээн ажиллуулж байгаа билээ.
Өнөөдрийн байдлаар Монгол улсын 2.2 сая иргэн фэйсбүүкийн идэвхтэй хэрэглэгч болоод байгаа бөгөөд үүгээр дамжуулан олон нийтэд худал, ташаа мэдээллийг хүргэх явдал ихэсч байгаа юм.
Үүнтэй холбогдуулан иргэдийн үзэл бодлоо чөлөөтэй илэрхийлэх, үг хэлэх хэвлэлийн эрх чөлөөг хамгаалж гагцхүү Фэйсбүүк хэрэглэгчдийн хэм хэмжээ “Community Standards” болон Монгол Улсын холбогдох хуулийн хэрэгжилтийг фэйсбүүк нийгмийн сүлжээнд хангах хүрээнд олон нийтийн аюулгүй байдалд шууд аюул занал, учруулж болохуйц гэж үзсэн тухайн контент болон бүртгэлтэй хэрэглэгчийн хувийн аккаунтийг устгах, түдгэлзүүлэх зэрэг арга хэмжээ авч хамтран ажиллахаар болжээ.
Фэйсбүүк компани нь Монгол Улсын “green channel”-р ирүүлэх гомдол хүсэлтийг түргэн шуурхай шийдвэрлэж хариуг өгөх бөгөөд тэдний гомдол, хүсэлттэй холбоотой илүү мэдээлэл, судалгааг хийхэд Харилцаа холбооны зохицуулах хорооны ажлын баг хамтран ажиллахаар болсон байна.
Гэхдээ тухайн контентийн агуулга нь зөвхөн дараах хүрээнд байна. Үүнд:
• Хүчирхийлэл болон гэмт хэргийн шинж чанартай
• Олон нийтийн аюулгүй байдалд сөргөөр нөлөөхүйц үзүүлсэн
• Амиа хорлолт ба өөрийгөө золиослох
• Хүүхдийн бэлгийн мөлжлөг
• Садар самуун
• Дээрэлхэх ба дарамтлах
• Хувийн мэдээллийн нууцлал
• Үзэн ядах үг хэллэг
• Спам
• Худал мэдээлэл
• Оюуны өмч
• Журамласан бараа бүтээгдэхүүн
Фэйсбүүк компанийн “Community standards”-ийн дагуу “public figure” буюу улс төрийн албан тушаалтан, тэдгээртэй холбоотой шүүмжилсэн, гүтгэсэн, доромжилсон агуулгатай аливаа төрлийн мэдээ, мэдээлэлтэй холбоотой гомдлыг “ногоон суваг”-аар хүлээж авахгүй. Учир нь үзэл бодлоо илэрхийлэх олон улсын хэм хэмжээний дагуу олон нийт нь улс төрийн албан тушаалтны талаар хэлэлцэх, шүүмжлэх, мэдээлэл солилцох бүрэн эрхтэй юм.
Түүнчлэн цаашид 2020 оны УИХ-ын сонгууль болон Монгол Улсын хуулийн хэрэгжилтийг фэйсбүүк нийгмийн сүлжээнд хангуулахад хамтран ажиллахаар төлөвлөжээ.
