Жилд 1,5 сая тонн газрын тос боловсруулах үйлдвэрийн дэд бүтцийн нээлтийг хийнэ

Өнөөдөр Дорноговь аймгийн Алтан ширээ суманд газрын тос боловсруулах үйлдвэрийн дэд бүтцийн нээлт болох юм. Энэхүү үйлдвэрийг Бүгд найрамдах Энэтхэг улсын 1.2 тэрбум ам.долларын хөнгөлөлттэй зээлээр барихаар төлөвлөсөн. Анх 1 тэрбум доллараар барихаар төлөвлөөд байсан уг үйлдвэрийн дутагдал санхүүжилтийг Ерөнхийлөгч Х.Баттулга өнгөрсөн сарын сүүлээр Шинэ Делид хийсэн төрийн айлчлалын үеэр шийдэгдэж, 236 сая ам.долларын нэмэлт санхүүжилтийг авахаар болсон билээ. Ингэснээр уг төслийн санхүүжилт бүрэн шийдвэрлэгдэж, үйлдвэрийг барих боломж бүрэн хангагдсан юм.
Өнөөдөр Алтан ширээ суманд болох төслийн нээлтэд Ерөнхий сайд У.Хүрэлсүх, БНЭУ-ын Газрын тос, байгалийн хийн сайд Д.Претхан, Монгол Улсад суугаа элчин сайд М.П.Сингх, Монгол улсын Гадаад хэргийн сайд Д.Цогтбаатар, Эрчим хүчний сайд Ц.Даваасүрэн, Зам тээврийн хөгжлийн сайд М.Энх-Амгалан, УУХҮ-ийн сайд Д.Сумъяабазар, Батлан хамгаалахын сайд Н.Энхболд, Дорноговь аймгийн засаг дарга Т.Энхтүвшин нар оролцохоор болжээ.
Үйлдвэр ашиглалтад орсноор дотоодын түүхий эдэд түшиглэн газрын тос боловсруулж, түлш шатахуунаа өөрсдөө бүрэн хангах боломжтой болох юм. Үйлдвэрийг тосны олборлолтын хэмжээнд нийцүүлэн жилд 1,5 сая тонн газрын тос боловсруулах хүчин чадалтайгаар, түүхий тос дамжуулах хоолойн хамт байгуулахаар төлөвлөжээ. Цаашлаад аж үйлдвэрийн цогцолборын томоохон бүрэлдэхүүн хэсэг болох нефть-химийн үйлдвэрийн суурь болно гэж үзэж байгаа юм.