Өнгөрөгч амралтын өдөр Япон улсын Чиба, Гунма, Канагава мужуудыг “Хагибис” хар салхи дайран өнгөрлөө. Энэхүү хар салхины талаарх мэдээг олон нийтэд цаг алдалгүй өгч байсан хэдий ч сүүлийн мэдээгээр есөн хүн нас барж, арван таван хүн ор сураггүй алга болоод байгаа юм. Мөн 41,000 өрх гэрэл цахилгаангүй болж улс орон даяар 90 гаруй хүн бэртсэн болохыг мэдээлж байна.
Одоо Онцгой байдлын алба болон бусад хүчний байгууллагын 27.000 хүн тус бүс нутагт ажиллаж иргэдийг аврах, аюулгүй газарт шилжүүлэх, нурсан үерийн даланг сэргээх зэрэг арга хэмжээг авч байгаа аж. “Хагибис” нэртэй хар салхи бямба гаригт 19.00 цагийн үед Хоншу арлыг дайрах үед хурд нь цагт 216 км хүрч байсан нь 1958 онд Токио орчмыг дайрсан хар салхитай ижил хүчтэй гэж мэргэжилтнүүд тооцоолж байна.
Энэ удаагийн далайн хар шуурганд аюулын дөрөвдүгээр зэрэглэлийн сэрэмжлүүлэг өгсөн бөгөөд үүнтэй холбогдуулан тус бүс нутаг дахь төмөр замын сүлжээнүүд бүх чиглэлд, JR компани хэсэгчилсэн байдлаар хөдөлгөөнөө зогсоожээ.
