Цэцэрлэгээ \”сугалаадсан\” манай төр дунд сургуулиа ч бас \”сугалааддаг\” болох вий дээ

Есдүгээр сарын 1-ний өдөр. Хичээлийн шинэ
жил эхэллээ. Энэ өглөө байдгаараа гоёж, аав, ээжтэйгээ хөтлөлцөн багачууд,
цэцэрлэг рүүгээ яарч, шинэхэн дүрэмт хувцасаар гангарсан хүүхдүүд сургуулийнхаа
гадаа цуглаж, шинээр элссэн болон анги дэвшсэн оюутнууд хотын гудмаар алхалж,
хөл хөдөлгөөн ихтэй байна. Зуны саруудад нам гүмхэн байсан хот нойрноосоо сэрч,
хөл хөдөлгөөнд умбажээ.

 

Энэ л өдөр боловсролын бүхий л байгууллага
үүд хаалгаа нээж суралцагчдаа хүлээн авдаг болохоор энэ биз. Монгол Улсын
Үндсэн хуулинд хүүхэд бүр сурч боловсрох эрхтэй. Бүрэн дунд боловсролыг үнэ
төлбөргүйгээр эзэмшүүлнэ гээд заачихсан байдаг. Гэвч сургууль цэцэрлэгийн
хүрэлцээгүй байдал үндсэн хуулиар олгогдсон эрхийг зөрчиж, мөнгө олох ашиг
сонирхлыг бий болгоод удаж байна.

 

Хэрвээ сургууль цэцэрлэгийн тоо
нэмэгдүүлбэл бүрэн дунд боловсрол эзэмшихэд мөнгө төлөх шаардлагагүй болно гэж
ойлгодог. Гэвч өнөөгийн нөхцөлд улсын сургуульд бүртгүүлж, элсэнэ гэдэг аз
эзийн л асуудал болчихоод байна. Тиймээс хүүхдээ бусдаас хоцроочихгүйн тулд
хувийн гэх тодотголтой сургууль мөнгө төлж оруулахаас арга байдалд эцэг эхчүүд
орчихоод байгаа юм.

 

Дунд сургуульд ингэсгээд орчихож болж
байна. Гэтэл цэцэрлэгийн асуудал бүр хүнд. Жишээлбэл, нийслэлд үйл ажиллагаа
явуулж буй цэцэрлэгүүд нийт цэцэрлэгт хамрагдах ёстой багачуудын тоо харилцан
адилгүй. Тиймээс л азтай нь цэцэрлэгт хамрагдаж, азгүй нь гэртээ цоожлуул гэдэг
дүрмийг сүүлийн жилүүдэд ашиглах болсон. Сугалааны тухай ярьж байгааг ойлгосон
байлгүй. Хүүхэд харах үйлчилгээний тухай гэх маш сүрчин хуультай. Гэвч энэ
хуулиар далимдуулж хүүхэд харах нэрээр мөнгө олохыг хүсэгчид нэмэгдлээ.
Цэцэрлэгт олгодог боловсролыг айлын хажуу өрөөнд өгнө гэж юу байхав. Ёстой
нэрэндээ таарч өдөртөө хараад өгч байгаа нь их юм л гэж бодогдоно.

 

Хэрвээ цэцэрлэг хүрэлцээтэй бол хүүхдээ хүн
харуулчихаад ажил дээрээ тогтож сууж чадахгүй байдал үүсэхгүй л байлаа. Даанч
манай төр ирээдүйгээсээ мөнгөө харамлаж, цэцэрлэг барих гэхээс татганаж, баяр
наадам цацсаар сууна.

 

Шинээр байшин барих шаардлага алга. Тийм
газар ч Улаанбаатар хотод ховор биз. Түүний оронд өнөөдөр ашиглалтад орчихоод
байгаа барилгуудын нэг давхарыг газраа
ашиглуулсны төлбөрт аваад тэндээ цэцэрлэг сургууль нээгээд явчихах нь тийм ч
хүндрэлтэй асуудал биш юм шиг. Гэвч хүүхдийн цэцэрлэг гэхээсээ баар, хоолны
газар ажиллуулах, түүнд зөвшөөрөл өгөх нь манай дээдчүүдэд илүү санагддаг нь
ойлгомжтой.

 

Хууль хаана зөрчигдөж байна вэ. Хууль энд л
зөрчигдөж байна. Хүүхэд бүр сурч боловсрох, үүнийг үнэ төлбөргүй авах эрхтэй.
Гэвч тэр эрх нь зөрчигдсөөр л байна. Үр хүүхдээ сурч боловсруулах, ирээдүйг нь
гэрэл гэгээтэй байлгахын төлөө төр засагт найдалгүй эцэг эхчүүд бид л хамтран
ажиллах шаардлага тулгарчээ. Үгүй бол цэцэрлэгийн багачуудаа сугалааддаг манай
төр хэдхэн жилийн дараа дунд сургуулиа ч бас сугалааддаг болчих вий дээ.

 

Үндэстэн агентлаг