УИХ-ын 2020 оны сонгуульд АН-ынхан 100 сая төгрөгөө төлж л байвал хэн нь хамаагүй нэр дэвш гэсэн зарчим баримталж буй нь олон нийтийн дургүйцлийг ихэд төрүүлсэн сэдэв болоод байгаа билээ.
Мэдлэг боловсрол,ёс зүй огт хэрэггүй гэсэн намын даргын дарамт нь Монголын төрийг авлигалчдаар дүүргэж, ашиг сонирхлын зөрчлийг гүнзгийрүүлэх бодлого болж, энэ нь хууль мэт үйлчлэх нь нэгэнт тодорхой болов.
Өнөөдөр Монгол улсын Ерөнхийлөгчийн Тамгын газрын дарга З.Энхболд ажлаа өгч буйгаа мэдэгдлээ. Тэрээр одоо АН-ын дарга С.Эрдэнийн Ахлах зөвлөхийн л статустай болж ирэх сонгуульд нэр дэвших бэлтгэл ажилдаа өнөөдрөөс эхлэн орохоо мөн дуулгав.
Уг нь З.Энхболд улс төрийн албан тушаалтан тул ажлаа өгөлгүйгээр сонгуульд нэр дэвших эрх нь нээлттэй. Гэтэл тэрээр АН-ын сонгуулийг үндсэндээ далдаас удирдах их ажлын гараагаа ийнхүү эхэлж байгаа бололтой.
Одоогийн байдлаар АН-аас ирэх сонгуульд нэр дэвших мөрөөдөлтэй мөнгөнөөс өөр эрдэм чадалгүй горилогчид 100 саяын дэнчингээ өгөөд байгааг З.Энхболд удаа дараа мэдэгдэж байна. Түүний өнөөдөр өгсөн тайлбараар бол АН-ын 100 сая төгрөгийг хувь хүнээс 1 сая төгрөг, аж ахуй нэгжээс 10 сая төгрөг авах зарчмаар бүрдүүлж байгаа гэх…
Тэгвэл АН-аас нэр дэвших 1 нэр дэвшигчид 7 аж ахуй нэгж тус бүртээ 10 сая төгрөг өгнө гэж тооцоход 100 гаруй хүний ард 800 орчим аж ахуй нэгжийг С.Эрдэнэ дарга болон түүний гар хөлүүд авлигалын сүлжээний бизнес рүү хөтөлж байна гэсэн үг. Мэдээж АН-ын нэр дэвшигч нарт 10 сая төгрөг зүгээр ав гээд өгөх бизнес эрхлэгчид байхгүй. Харин тэдний хамаарал бүхий аж ахуй нэгжүүд болоод тэднээр дамжиж компанийнхаа санхүүжилтийг өсгөсөн компаниуд л хандив өгнө. Эцэст нь тэр компаниуддаа ашиг хүртээх зарчим үйлчилнэ гэх хардлага төрж байна.
100 саяын хандивыг З.Энхболд өнөөдөр хийсэн мэдээллийнхээ үеэр далд агуулгаар өөрсдийгөө илчилсэн. Тодруулбал тэрээр “бид төрд гараад эдийн засаг сайжирвал хандив өгсөн аж ахуй нэгжүүдэд бүгдээрэнд нь хүртээлтэй гэв”. Энэ нь АН-ынхан эрх барьсан үедээ, улсын мөнгийг хайр найргүй өөрсдөдөө ашигтай байдлаар зарцуулж эдийн засгийг уналтанд оруулдаг гэдгийг нь нотолж байгаа юм.
Мөн Ардчилсан намынхан төрийн өндөр албан тушаалд очихоороо улс орноо зарчхаад гадаадад нэг нэгээрээ гарч, гадны улсын иргэн болж зугтдаг итгэлгүй нам гэдгээ ч өөрсдөө зарлалаа.
Өөрөөр хэлбэл тэд хамтын хариуцлага хүлээх ёстой байтал бүгдээрэй л АН-ынхан гэж явчхаад улсыг удирдах төрийн өндөр сэнтийг хувийн эрх ашигтаа ашиглаж, өөрсдөө хөрөнгөжөөд зугтдаг. Бодит жишээ бол АН-ын гишүүнээс Монгол Улсын төрийн тэргүүний суудалд бүтэн 8 жил тухалсан Ц.Элбэгдорж, Монгол улсын 28 дахь Ерөнхий сайд Ч.Сайханбилэг гээд нэрс цаашаа уртаас уртаар хөвөрнө. Ард түмнийг төлөөлөх үүрэгтэй тэд бүгд л ийм үйлдэл хийдэг,цаашдаа ч хийнэ гэдгээ бүр намын дарга С.Эрдэнэ нь хүртэл ил цагаан хэлсэн.
Тэхээр АН-аас мэдлэг боловсролтой, ёс зүйтэй улс орныг удирдах хэмжээний лидер улс төрчид ирэх сонгуульд нэр дэвшинэ гэж хүлээх, найдах ч хэрэггүй гэдгийг тэд өөрсдөө бидэнд эхнээсээ хэлээд байгаа бололтой.
