“Эрдэнэс-Тавантолгой” ХК-ийн Төлөөлөн Удирдах Зөвлөл хувьцаа эзэмшигчдэдээ ногдол ашиг өгөх шийдвэрийг өнөөдөр гаргажээ.
Уг шийдвэрийн дагуу нэгж хувьцаанд 90 төгрөг олгох бөгөөд 1072 ширхэг хувьцаатай иргэнд 96480 төгрөг оногдох юм байна.
Мөн ногдол ашиг тараах шийдвэртэй холбоотойгоор ЭТТ нэгдсэн бүртгэлийн аппликейшнийг танилцууллаа.
Уг аппликейшнийг татаж авснаар иргэд хувьцааныхаа тоо ширхэгийг шалгах, хянах, мэдээ мэдээлэл авах, санал өгөх зэргээр ашиглаж, цаашдаа ЭТТ компанитай хувьцаа эзэмшигчийн зүгээс холбогдох, хөрөнгийн зах зээлд оролцох бүрэн боломжтой болох юм.
Энэ тухай мэдээллийг компанийн вэб сайт, пэйж хуудас, “Эрдэнэс-Тавантолгой” аппликейшн, 1072 пэйж хуудас болон 1800-1072 тусгай утас гэсэн зөвхөн албан ёсны эх сурвалжаас авах шаардлагатай. Үүнтэй холбоотойгоор Хувьцаа эзэмшигчдийн хурал хүртэл Даваа гараг бүрийн 13:00 цагт ЭТТ ХК-иас ногдол ашиг болон компанийн үйл ажиллагаатай холбоотой мэдээллийг тогтмол хүргэж байх юм байна.
| Эзэмшиж буй хувьцааны тоо ширхэг | Тус хувьцаанд ногдох үнэ /₮/ | Тус хувьцааг эзэмшиж буй иргэдийн тоо |
|---|---|---|
| 527 | 47,130 | 10,844 |
| 536 | 48,240 | 28,160 |
| 741 | 66,690 | 334,519 |
| 750 | 67,500 | 667,898 |
| 848 | 76,320 | 41,359 |
| 857 | 77,130 | 131,256 |
| 955 | 85,950 | 9,393 |
| 964 | 86,760 | 34,491 |
| 1,063 | 95,670 | 56,346 |
| 1,072 | 96,480 | 1,080,592 |
Уг шийдвэрийн талаар УУХҮ-ийн сайд Д.Сумъяабазар болон “Эрдэнэс Тавантолгой” компанийн удирдлагууд яг одоо мэдээлэл хийх гэж байна.
