2012 оны 4-р сарын 11-ний өдрөөр тасалбар болгон иргэний шинэчилсэн бүртгэлд хамрагдсан Монгол Улсын иргэн бүрд Засгийн Газрын 216 тоот тогтоолын дагуу “Эрдэнэс Тавантолгой” ХК-ийн 1072 ширхэг хувьцаа буюу 1072х933₮=1,000,000 төгрөгийн үнэ бүхий хөрөнгийг эзэмшүүлсэн.
“Эрдэнэс Тавантолгой” ХК нь 2019 оны үйл ажиллагааны цэвэр ашгаас нэгж хувьцаанд 90₮-ийн ногдол ашиг олгох шийдвэрийг 2020 оны 2-р сарын 17-ны өдөр гаргасан. Жишээ нь 1072 хувьцаатай иргэн 1072×90=96,480₮-ийн ногдол ашиг авна.
Ногдол ашиг олгох үйл ажиллагаатай холбоотойгоор “Эрдэнэс Тавантолгой” ХК-иас 2020 оны 5-р сарын 18-ны өдрийн 01/1259 тоот албан бичгийг брокерын компаниудад ирүүлсэн.
2020 оны 5-р сарын 15-ны өдрийн байдлаар “Эрдэнэс Тавантолгой” ХК-ийн хувьцаа эзэмшигч 2,512,768 иргэнээс 856,030 нь үнэт цаасны данс нээлгээгүй, үнэт цаасны дансаа нээлгэсэн 1,656,738 иргэн байгаагаас 702,266 иргэн нь өөрийн нэр дээрх арилжааны банкны дансаа холбуулсан байгаа тухай болон ногдол ашгийг үнэт цаасны зах зээлийн холбогдох хууль, журамд нийцүүлэн олгох тул холбогдох ажиллагааг богино хугацаанд хийж гүйцэтгэхийг дурдсан байна.
“Эрдэнэс Тавантолгой” ХК-ийн хувьцаа эзэмшигч иргэд үнэт цаасны данс нээлгэсэн, тус дансандаа өөрийн нэр дээрх арилжааны банкны дансыг холбуулсан байх шаардлагатай ба тус дансаараа дамжуулан ногдол ашгийн мөнгөө авах юм.
