Цаг үеийн шаардлагаас болоод элдэв урамшуулдаг, худалдан авалтын үнийн дүнгээс хувь хүртээдэг карт, түүнийг дагасан үйлчилгээнүүд олширч байна.
Ер нь хүн худалдан авалт хийх явцдаа түүнээс урамшуулал авдаг байвал зүгээр. Үүнийг нь шийдэж өгч байгаа бүр л сайн. Гэтэл худалдагч, худалдан авагч хоёрын дундуур өөрөө сайн дураар гарч ирсэн үйлчилгээнүүд “царай алдаад” эхэллээ.
Тодруулбал, U POINT /хэрэглээнд нэвтрээд нэг их удаагүй санагдаж байна. Миний хувьд саяхан л хэрэглэгч болсон/ үйлчилгээ хэрэглэгчдээсээ сар бүр хураамж авахаар болсон тухайгаа өчигдөр зурвасаар мэдэгдлээ.
Иргэн би U POINT гэгчийг ашигласныхаа төлөө сар бүр 300 төгрөг, гэр бүлээрээ ашигладаг бол сар бүр 500 төгрөгийн хураамж төлөх юм гэнэ. Царай алдсан үйлчилгээний тухай, царай алдсан зүйл бичиж байгаагаа ойлгож байна. Тиймээс уншигч танаас хүлцэл өчье.
Хамгийн гол нь энэ хугацаанд би бээр өнгөрсөн хугацаанд 4500 гаруй төгрөгийн бонус цуглуулсан байна. /Өөрийгөө, гэр бүлээ маш бага худалдан авалт хийдэг юм байна гэж ойлголоо/ Гэтэл энэ цуглуулсан бонусыг минь 10 сарын хугацаанд хумсалсаар авч дуусгах юм байна. Уг нь урамшуулдаг үйлчилгээ гэж ойлгосон. Гэтэл хурамтлагдсан бонусыг минь хураамж нэрээр хумслах тун мэргэн санааг U POINT-ынхон сэджээ. Гэхдээ үнэхээр царай алдсан шимэгч үйлдэл байна гэж дүгнэхээр.
Хүсэхгүй бол болчихож болно гэх байх. Тийм ээ, би болино. Бүх зүйлс ухаалаг болж, шинэчлэгдэн өөрчлөгдөж байхад нэг муу царай алдсан үйлчилгээнд царай алдсан хураамж төлөөд суух нь тун оновчгүй санагдсан учраас би болихоор шийдлээ. Уншигч та яахаа өөрөө л мэд. Гэхдээ хумсалсаар хумсалсаар хулгайч гэдэг шиг, хулгайн сэтгэхүйтэй ийм үйлчилгээнүүд хол явахгүй дээ…
Иргэн Туул
