-Ингээд түүний амьдралын дүрмийг танилцуулья-
Бүх дэлхийн аваргын тэмцээнүүдийг нийлүүлээд нэг олимпийн наадмын үнэд хүрэхгүй. Би мэдээж бүх мэхийг мэднэ. Гэхдээ үнэнийг хэлэхэд гуравхан мэх л хийж чадна. Яах вэ дээ, ялахад надад хангалттай л байна.
Аав минь “Оноогоор ялна гэдэг байж болшгүй зүйл. Ямар ч маргаангүй, цэвэр ялалт хэрэгтэй” гэж хэлсэн. Би энэ үгийг амьдралынхаа зарчим болгосон. Миний амьдралын үлгэр жишээ бол аав минь байлаа. Нэг удаа аав намайг дуудаад телевиз заагаад “Энэ хүнийг сайн харж ав. Красноярскийн алдарт бөх Иван Ярыгин. Ийм л хүн болоорой” гэж хэлж билээ.
Амьдрал хүн болгонд боломж өгдөг. Гол нь чи тэр боломжоо хүлээн авахад бэлэн байх чухал.
“Тэмцээн гэдэг бол үзэгчдийн өмнө болж байгаа бэлтгэл” гэж Виктор Михайлович Кузнецов ярьдаг байв. Би жилд хэдэн арван тэмцээнд оролцож, ялсаар өрсөлдөгчдийнхөө толгойд “Карелинийг ялах боломжгүй” гэдэг бодлыг суулгасан.
Амжилтын 5 хувь нь л авьяас, үлдсэн нь хөдөлмөр, хүч нулимс. Тиймээс аварга болохыг хүсч байвал хөдөлмөрлөхөөс бүү ай.
Барселонагийн олимпийн дараа би зодог тайлахаар бодож байлаа. Дасгалжуулагч надад “Саша чи тэрийг хар даа. Хэн зогсож байна? Александр Васильевич Медведь. Энэ хүн гурван удаагийн олимпийн аварга. Харин чи юу билээ” гэж хэлсэн. Би тэр дороо бэлтгэлээ хийхээр танхимд орж билээ. Олон бөхчүүд барилдааны өмнө ирээд намайг цэвэр битгий ялаач гээд гуйдаг байлаа. Гэтэл Атлантад зүүн гар гэмтээд ганц гартай барилдаж байхад тэд гэмтэлтэй гарыг санаатайгаар хөндөж, зарим нь шүүгчийн нүдийг хариулж байгаад цохиж байлаа. Би олимпийн дараа гэмтлээ эмчлүүлж байхдаа буцаж ирээд бүгд намайг хараад өөрсдөө зугтаад өгөхөөр айдаг болтол нь хашраана даа гэж бодож байв.
Өөртөө хамгийн тохирсон сонгомол барилдаанд орсноор миний спортын амьдрал амжилт арвин байх нь анхнаасаа тодорхой байсан.
Депутат болсон анхны жил Төрийн Думын имижмейкер намайг хэл яриагаа зас, үсээ богино засуулж болохгүй, жинс битгий өмс, жийп машин унаж хэрэггүй гээд л сургадаг байлаа. Би тэсэхгүй “Ер нь бүх шаардлагад чинь нэг мөсөн тааруулаад уруулаа будаад ирэх үү” гэж хэлж байсан юм. Байгаагаасаа илүү харагдах гэж оролдох утгагүй хэрэг. Тэгээд ч би нутгаасаа сонгогдсон хүн. Тэнд бүх хүн намайг жоохон бацаан байхаас л мэднэ.
Дүрэм өөрчлөгдөөд ялагдлаа гэж бөхчүүд ярьдаг. Ямар ч дүрэмтэй байсан ялдаг байх хэрэгтэй. Дайрах довтлох, давамгайлах. Шүүгчдээс “бэлэг” хүлээж, өрсөлдөгчөө өвдөх байх гэж найдах хэрэггүй.
Дэлхийн бүх орон олимпийн наадамд оролцогчдыг бэлтгэдэг, харин оросууд олимпийн аваргуудыг бэлтгэдэг гэсэн үг бий. Үнэн шүү, манай бөхтэй нэгэн хэсэгт орсон хэн ч гэсэн сугалаа хатуу таарлаа гэж ярьдаг.
Би хүүгээ бөх барилд гэж шахаагүй. Интернэтээр хэсэж, буйдан дээр хэвтэж байхаар спортоор хичээллэ гэж л хэлсэн. Заавал тамирчин болох албагүй ч эр хүн хүчтэй байх ёстой. Нохой хийх юмгүй болохоороо төмсгөө долоогоод хэвтдэг. Харин хүн хийх юмгүй болохоороо цавуу үнэртэж, хар тамхи татдаг.
